Inthlan laia lirthei dah phal lohna tichhuak

Traffic SP Stephen Lalrinawma chuan thupek chhuahin, April 19, naktuka Lok Sabha inthlan neih tura Aizawl district-a inthlan kaihhnawih duty turte lirthei chêt velnaah harsatna a thlen loh nan Aizawl khawpuia lirthei dah phal lohna hmun a tarlang.

Stephen Lalrinawma chuan, lirthei dah phal lohna hmun kawngpui dunga lirthei chhia emaw, bungrua emaw kawng dâla awmte chu Traffic Control Room phone number 0389-2313061/ 9366553559-ah hriattir tur a nih thu leh inhriattir lote chu hnuh sawnsak an nih dawn thu a tarlang bawk.

Thupek hian chhiatrupna thil, kângmei leh rîkrum kaihhnawiha duty, dan leh thupek pawimawh bika police leh magistrate duty-te leh election polling party, Assembly annex building leh DC Office-a kal turte chêt velna a huam lo. Thupek zâwm lo chu MV (Amendment) Act, 2019 Section 177 hmanga hrem theih an ni.

LIRTHEI DAH PHAL LOHNA HMUN

April 18, 2024 (Niléngin):
• Saikhamakawn-Tlangnuam field panna kawng, Kulikawn-Saikhamakawn CP Road-ah Hridaikawn kaltlangin, leh Tlangnuam Field panna kawng.
• Greenwood Hospital péng leh Brigade Field inkar.

April 19, 2024 (Tlai dar 4 thleng)
• Treasury Square-Assembly House Annex Building, Tennis Court kawngpui dung, Planning office kawt, Aizawl South Treasury office kawt, CS Bungalow chung kawngpui dung.
• Aizawl DC office aṭanga main road inkar, AOC Petrol Pump bul, Congress Bhavan bul chhukthla, Post Office kawt, Vanapa Hall kawt, Transport office kawt, SBI Main Branch kawt, Assam Rifles Magazine Guard hnuai.

April 19, 2024 (Zan dar 6 aṭangin)
• Polling party-te an haw khawm dawn avangin Zodin Square leh Raj Bhavan hmar lam gate inkar kawng oneway a ni ang.
• Hmar lam aṭangin chhim lam pan chauhin a kal theih dawn a, chhim lam aṭanga hmar lam pan turte chu Tennis Court/ Temple Square kaltlangin a kal theih ang.