Political party-te'n an candidate-te vote turin Mizoram mipui an ngen

Lok Sabha inthlanpui atan nimin kha campaign theih ni hnuhnung a ni a, political party pali - BJP, INC, MNF leh ZPM-te'n Aizawl Press Club-ah thuthar thehdarhtute kâwmin, an candidate vote turin Mizoram mipui an sâwm.

BJP

BJP, Mizoram Pradesh chuan chawhma dar 11-ah press conference an nei a; BJP secretary Dr Zonuntluanga chuan, India-in hma a sawn zel tih sawiin, "Ram hausa pathumna kan ni thuai dawn. India independence centenary kan lawm hun 2047-ah chuan khawvela ram hausa ber kan ni thei dawn a, India ram a inbuatsaih mup mup. He movement hi Zoramah pawh a hlawhtlin theih nan BJP candidate Pu Vanlalhmuaka vote vek turin kan insáwm e," a ti.

Dr Zonuntluanga chuan, sakhua a intluk tlang lo deuha an hriat thu sawiin, "Lal Isua hi a chungnung ber. India ramah hian sakhaw hrang hrang kan zalen viau a, Kristiante pawh zalen takin kan inkhawm thei vek, Kristiana inlehtir kan tum chiah hian harsatna kan tawk," a ti a; secularism tih chu sakhaw intluktlànna leh sakhaw zalenna tihna a ni lo a, sakhuana leh sorkarna a hrangin a awm tur a ni tihna niin a sawi.

CONGRESS PARTY

Congress party candidate Lalbiakzama chuan chhun dar 12-ah thuthar thehdarhtute a kâwm a; India ram - hnam tinte zalen tak leh indawh tawn chunga mahni sakhua ṭheuh thlamuang taka an biak theihna, hnam dan ṭheuh inzahsak tawn chunga chenhona ram chu chhan a ngai ta nia sawiin, "Congress leh a thurualpui kut tichak tur leh kan ram, hnam, sakhua him zelna turin rilru fím tak nen vote thlâk turin mi tin ka ngen a ni," a ti.

Lalbiakzama chuan, Mizorama agriculture infrastructure ṭha din chu hna hmasaa neih a hun tawh tih sawiin, "Eng lai mai pawha central sorkara vehbûr khawn reng tur anga inngaih a hun tawh lo. Buh leh thlai kan thar theihna hmun âwl zau tak kan la neihte hi kawngpuiin pawh ila, hmanraw ṭha leh tunlai thiamna nen cheibáwlin, mahni intodelhna kawngah hmalak tak tak a pawimawh ta," a ti a; central aṭanga scheme awmte chu dik taka enkawl leh tihpuitlin a ṭul thu a sawi.

ZPM PARTY

Chawhnu dar 1-a ZPM party aiawha press conference kotu Eddy Zosangliana Colney, general secretary chuan, "April 19, Zirtawpni hian MP (Lok Sabha) kan thlang dawn ta. Khawngaihtaka ZPM official candidate Pu Richard Vanlalhmangaiha min lo vote sak ṭheuh turin Zoram mipuite thinlung leh tih tak zetin kan sâwm che u. A chhinchhiahna chu lukhum a ni e, " a ti.

Eddy Zosangliana chuan, MNF candidate K Vanlalvena chu MNF sorkar laiin Luangmual High School Vengah in hmun atan Industry department ram pek a nih thu a sawi a; in hmun chu dan loa pek a nih avangin sorkara hlân lêt tura an beisei thu a sawi bawk.

MNF PARTY

MNF chuan chawhnu dar 2-ah press conference an nei a; MNF treasurer Lalruatkima chuan, khua leh tui ṭha nihna leh democracy ropuina lantir nan vote thlak turin Mizo mipui a ngen a, "Pathian leh mipui zarah chakna kan chan ngei kan beiseina a sang hle," a ti a; MNF candidate K Vanlalvena vote tura mipui ngenin, a chhinchhiahna chu arsi a nih thu a sawi.

Lalruatkima chuan, campaign chhungin party hrang hrangte'n Pathian hruaina leh vênna an dawn avangin lawmawm an tih thu a sawi a; an candidate K Vanlalvena chu Mizo mipuiin an hre chiang thaw khata a lan thu sawiin, "MP kal tawhte'n MP ngawi reng tihte an hlawh ṭhin a, chutiang karah chuan Pu K Vena kan nei zet chu thil mak a thleng ta emaw tih loh rual loin, kum thum chhungin vawi 15 zet thu a sawi tawh a ni," a ti. Mizoramin MP huaisen, taima leh káwlhráwng a mamawh tih hriaa vote thlak fimkhur turin mipui a chah bawk.