ZPM-in campaign khârna hun an hmang

ZPM party chuan nimin khan Vanapa Hall-ah Lok Sabha inthlan atana campaign khârna inkhawm an buatsaih a; ZPM leader Lalduhoma chuan, sum renchem dan ṭha ber chu eirûk loh a nih thu a sawi.

Lalduhoma chuan, Finance department-a thawkte chungah a lawm thu leh department dangte pawhin sum an renpui avangin a lawm thu a sawi a, "Sum renchem dan ṭha ber chu eirûk loh hi a ni. Kan vaiin kan eiru lo a, sum hman tur hi a tam em em mai a ni," a ti.

April 1, 2024 aṭangin ZPM sorkarin a pualin budget an nei ṭan tih sawiin Duhoma chuan, "Budget pumpui aṭangin 57% development atan kan dah thei," a ti. Ni 100 programme an duan chu minister-te'n an ti zo thei vek nia sawiin, "Thil ṭha nia kan hriat hi kan ti a, a ṭha lo kha kan ti lo mai. Kalphung tharah chuan kan thlarau nun thlenga tichhe thei sem thâwm a reh ta a, thawhrimna leh taimaknain hmun an chang a, kan ramah Pathian ram a zau mek zel," a ti bawk.

ZPM MP candidate Richard Vanlalhmangaiha pawhin thu sawiin, "Kan ram politics-a dik lo taka inbeihna awm ṭhin hi tun hnu zelah awm tawh lo se, keimahah hian tàwp hmak se ka duh," a ti a; thusawi mi a nih loh thu leh a taka thawk chi a nih zawk thu a sawi.

Richard Vanlalhma­ngaiha chuan, criminal complaint a thehluhah mimal takin huat a neih loh thu a sawi a; MP candidate zingah Mizoram sorkar nen lungrual taka thawk thei tur awm chhun a nih avangin amah vote turin mipui a sáwm a ni.