Vote thlâk turte tana ID hman theihte

Naktuka Lok Sabha inthlana vote thlak turte'n anmahni finfiahna identity card/document hman theihte Election thuneitute chuan an tarlang.

Sorkar thuchhuah tarlan danin, Lok Sabha inthlanpuia vote thlak tum, elector photo identity card (EPIC) nei chuan vote an thlak hmain polling station-ah EPIC chu an nihna (identity) tichiang turin an hmang tur a ni a; EPIC nei lo tan document hman theihte tarlan a ni.

Nihna tichiang tura document hman theihte chu - Aadhaar card, MGNREGA job card, an thlalak chuanna bank/post office passbook, Ministry of Labour hnuaia health insurance smart card, driving license, PAN card, National Population Register hnuaia RGI-in smart card a pek chhuah, Indian passport, thlalak chuanna pension document, central/state sorkar/PSU-te'n an hnuaia thawkte hnena thlak chuanna ID card an siam, MP/MLA/MLC-te hnena official identity card pek leh Ministry of Social Justice & Empowerment-in Unique Disability ID (UDID) card a pek chhuahte a ni.

EPIC-ah chhut sual/tihsual a awm chuan, thlalak leh card neitu a inmil a, EPIC neitu ngei a ni tih finfiah theih a nih chuan vote thlak phal a ni a; India khua leh tui, ram páwna awmte chuan vote an thlak dawnah original Indian passport an phawrh ngei a ngai a, ID dang pawm a ni lo.

Vote thlâk turte chu polling station-a an electoral roll serial number, vote thlak ni leh hunte awlsam taka an hriat theih nan voter infor­mation slip pek an ni ang a, vote thlak hma ni ngaah district election officer-te'n an pe chhuak a ni. Voter infor­mation slip hi voter-te finfiahna a ni lo.