MNF-in campaign khârna hun an hmang

MNF party chuan nimin tlai khan Vanapa Hall kawtah Lok Sabha inthlan atana campaign khârna hun an hmang a; MNF Campaign Directorate chairman Tawnluia chuan, ILP humhim tur te, Zo hnahthlakte thlavâng hauh zel tur te, border trade hlawhtlinna atante an candidate K Vanlalvena vote turin mipui a ngen.

Tawnluia chuan, "Enchhin ngai lo, kan hriat chian sa, hnam hmangaihtu, ram leh hnam leh sakhua a him theihna tura house chhung leh páwna au ngam, mi huaisen Pu K Vena kan nei hi a lawmawm. Kan hnam inhungbingna ILP humhim tur te, Zo hnahthlakte thlavâng hauh zel tur te, border trade hlawhtlinna atante Pu K Vena i vote ṭheuh ang u," a ti.

MNF candidate K Vanlalvena chuan, Rajya Sabha MP a nih anga hma a lak tawhna chhunzawm tur tam tak a awm nia sawiin, "Kan hma lo lak tawhte avangin mipuiin min vote duh ngei ka ring a, ka beisei a, ka ngen bawk a ni. Eng dinhmunah pawh ding ila, ram leh hnam, kan sakhaw tan theihtawp ka chhuah zel ang," a ti a; a hmachhawp hrang hrang a sawi lang.

MNF treasurer Lalruatkima pawhin thu sawiin, "Mi hrât khawkhéng, mi huaisen candidate kan nei hi a lawmawm hle. Candidate thlâk theih ni ta se, party ṭhenkhat hi chuan thlâk an châk hle ang," a ti a; MNF candidate K Vanlalvena vote turin mi zawng zawng a sáwm.

Hetih lai hian, kum 2016-a sorkar laipuiin Mizorama grape chíngtute hloh rulhsakna tur ṭanpuina, Market Intervention Scheme hnuaia Rs 3,70,35,141 a ruahman, kum 2018-a pek chhuah chu tihchingpen a nih thu social media-ah thehdarh a nih avangin dan anga hmalak a nih theih nan MNF party aiawhin Albert VL Lawma chuan nimin khan CBI leh ACB-ah FIR a thehlut tih MNF thuchhuah chuan a tarlang bawk.