Modi sorkarin Mizoram a duhsak - Nirmala Sitharaman

Union Finance minister Nirmala Sitharaman chuan nimin khan Mizoram a rawn tlawh a; Narendra Modi kaihhruai sorkarin Mizoram a duhsak thu Lengpui Airport bula thuthar thehdarhtute a kawmnaah a sawi.

Nirmala Sitharaman chuan, BJP kaihhruai sorkar a pian hma kum 10 leh a pian hnu kum 10-ah Mizoram sum hmuh nasa takin a pung niin a sawi a, "Hmasawnna pawh kum 10 kan sorkar chhungin nasa takin a thleng a, hmasawnna tur hrang hrang a la awm bawk," a ti.

BJP chu sakhaw tih bik nei lo a nih thu sawiin Nirmala Sitharaman chuan, "Kristian state Goa leh Nagaland-ahte pawh sorkarna kan siam mek," a ti a; an candidate Vanlalhmuaka vote turin Mizoram mipui a sáwm.

Nirmala Sitharaman chuan, tu mah thlei bik nei loin, PM scheme ṭha tak tak hmangin hmun kilkhâwr berah pawh hmasawnna a thleng mek niin a sawi bawk.

Union Finance Minister hian thuthar thehdarhtute a kawm hmain Siaha a tlawh a, nimin vek khan Delhi a pan leh nghal a ni.