KHAWTHLIR

MPF leh Aizawl SP

Mizoram People Forum hruaitute chu nimin khan Aizawl SP Rahul Alwal nen a pisaah an inkâwm a, Lok Sabha inthlan tluang taka a kal theih dan tur te, venhimna chungchangte an sawiho.

PYD-in thisen pe

Pentecostal Youth Department (NEI), Chhipphir Bial chuan April 16, Thawhlehni khan Mualṭhuam North kohhran sunday school hall-ah thisen pek an huaihawt a, Lunglei Civil Hospital tan thisen unit 62 an pe a, petute mipa 39 leh hmeichhia 23 an ni.

Governor kâwm

Governor Dr Hari Babu Kamkhampati leh Mizoram advocate general Biswajit Deb chu nimin khan Raj Bhavan-ah an inkâwm. India danpui hnuaia Article 191 leh 192 kaihhnawih thil pawimawhte bakah, Lok Sabha inthlan tur chungchangte an sawi dun a ni.

Tlân luh phal lo

Hnahthial SP chuan thupek chhuahin, Rallangtlang Helipad, Hnahthialah April 19, 2024 thleng phalna nei lo tan lirtheia tlân luh phal loh a nih thu a tarlang a, thupek ngai pawimawh turin mipui a ngen. Thupek zâwm lote chu hrem theih an ni a; thupek hian khuarel chhiatna, kângmei leh rîkrum thila duty te, dan leh thupek pawimawh bika police leh magistrate duty-te a huam lo.

Champhai tlawh

Lok Sabha inthlanpuia Assembly segment 20 enkawltu expenditure observer Anita Rinesh chuan nimin khan Champhai a tlawh a, Champhai district inthlan kaihhnawih sorkar hotute nen an inkâwm. DEO James Lalrinchhana chuan Expenditure Observer hnenah hian Election Expenditure Monitoring hnuaia Champhai district-a hmalakna report a hlan a ni.

Lehkhabu lehlin ṭha zual

Mizo Writers Association (MWA) chuan ṭawng danga ziah lehkhabu Mizo ṭawnga lehlin, kum 2023 chhunga tihchhuah an thlanna kal mekah a ṭha zual pathum an thlang chhuak tawh. Lehkhabu lehlin ṭha zual pathumte chu - K Siamliana lehlin 'My mother! My teacher!' tih te, Lalchhuanawma Tochhawng lehlin 'Notre Dame de Paris' tih leh, Lalzarzova Khiangte lehlin 'Tales of Man Singh' tihte a ni.