Hnathawk ṭha lote dodal turin chah

Serchhip bialtu MLA Lalduhoma chuan a bial mipuite chu an bial chhunga hmasawnna hnathawh reng reng ngaihven a, enzui ṭhin tur leh hnathawk ṭha lo chu dodal turin a chah.

Thenzawl Field Veng Branch YMA Run hnuaia UDPA department-in in­thiarna cheng nuai sarih senga an sak Inrinnia a hawnnaah thu sawiin Lalduhoma chuan, "Hnathawktuten hlep hnem an tum lutuk ṭhin hi hmasawnna daltu a nih phah fo avangin ven a ngai a, chumi veng tur chuan mimal leh tlawmngai pawlte penchhuah a pawimawh," a ti.

Lalduhoma chuan MLA fund hmangin a bialah hmun 10 velah hnathawh zawh a nih tawh thu sawiin, "Hmun 12 velah hna thawh ṭan leh mek a ni a, MLA fund hmanga hnathawhte hi uluk takin ka enfiah ṭhin," a ti a, sum tlemte hmangin hna ṭha taka thawh theih a ni tih Zoram mipui hriattir an tum tih a sawi. MLA-in a hawn tak vantlang inthiarna hi UDPA dept. chuan Field Veng Branch YMA kutah a hlan fel tawh a, khualzin leh a duh apiang tan man chawia inthiar theih a ni ang.