Supreme Court a dinna ngaiah a ding MBBS leh BDS atan NEET a ngai

Bachelor of Medicine and Bachelor of Surgery (MBBS) leh Bachelor of Dental Surgery (BDS) zir tur thlanna atana Supreme Court-in National Eligibility & Entrance Test (NEET) paltlang tura April 18, 2016-a thutlukna a lo siam tawh chu a kal tlangpui dawn.

State ṭhenkhat leh private medical college ṭhenkhat chu Supreme Court thutluknaah an lungawi loh avangin an appeal a; Court chuan Thawhlehni khan a ngaihtuah nawn leh a, a dinna ngaiah a ding.

Court-in thutlukna a siam tak avang hian Mizoram sorkar quota-a MBBS leh BDS zir tumte chuan NEET an paltlang a ngai dawn ta a ni.

Supreme Court chuan, sorkar laipui leh Central Board of School Education (CBSE) chu July 24, 2016-a NEET buatsaih tura inpuahchah turin a hriattir nghal.

NEET hi May 1, 2016 khan buatsaih a lo ni tawh a, zirlai 6,50,000 chuangin an hmachhawn. Supreme Court-in MBBS leh BDS zir tur tan NEET paltlang a ngai a tih leh tâk avangin NEET Phase-II chu July 24, 2016-ah buatsaih a ni leh dawn a, Phase-I leh Phase-II result chu a rualin, August 17, 2016-ah tihchhuah a ni ang.

Supreme Court chuan, state sorkar leh private college-te chu an thutlukna siam avanga harsatna an neihte chu anmahnia inchingfel mai turin a hriattir.

Hetih lai hian, Mizoram sorkara Higher & Technical Education department chuan May 24, 2016 hian MBBS leh BDS ni lo, technical line danga Mizoram quota-a zir tur thlanna atan State Medical & Techincal Examination (SMATE) a buatsaih dawn.

Kum 2015 khan Mizoram sorkar chuan MBBS-ah quota - Central pool-ah 25 leh NEC-ah pathum, BDS-ah quota Central pool-ah pa-thum leh NEC-ah pasarih a nei a ni.