Mizoram Larsapin D.Litt. degree a dawng

Nimina Bhaidas Hall, Juhu, Mumbai-a JJT University-in 3rd Special Con-vocation an hmanah Governor Lt.Gen. Nirbhay Sharma hnenah Doctor of Letters (D.Litt) degree hlan a ni.

Mizoram Governor chuan, India ram leh mi-puite tana hna a lo thawh tawhte ngaihhlutsak a, D.Litt. Degree pek a ni chu lawmawm a tih thu a sawi.

Larsap chuan, sorkar leh mipui tan kum 50 a thawh chhungin buaina, remna, hmasawnna, indona leh thil dang tam tak a hmu a, India tana hun chhinchhiah thlak tam tak a tawn tawh thu a sawi a, "India hian a phû tâwk dinhmun pawimawh khawvelah a luah thuai dawn a, India hi a insiam rem mek a ni," a ti.

Lt.Gen. Nirbhay Shar-ma chuan, India ram tana hun ṭha inher chhuak mekah hmarchhak mite, a bikin Mizoram ṭhalaite an zuan luh ve a ngaih thu sawiin, "An tan hun remchang buat-saih an phu a ni," a ti a; human resource chu India chakna hnâr a nih thu sawiin, Mizo
ṭhalaite zingah pawh mi chhuanawm leh entawn-tlak tam tak an awm a, tun hnaiah pawh Mizo pakhat chu Rashtrapati Bhawan-in Innovation Scholar atan a thlan thu a sawi.

Mizoramah zirna ngaih pawimawh a nih thu sawiin, Larsap chuan, "Zirna hian industry mamawh thiamna a pek chhuah a, chhawr tlak mithiam a chher a ṭul a, chu chu India ramin a mamawh a ni," a ti. JJTU leh university dangte chu hmarchhak leh Mizoramte nen student exchange neihpuiah a sáwm tih sawiin, research leh skill development lamah thawhhona neih a ṭangkai tur thu a sawi. Governor hian convocation-a telte chu Mizoram lam hawia ngaihtuahna seng tur leh remchanna zawng turin a sáwm a ni.

JJT University Convocation-ah hian Madhya Pradesh Governor Ram NareshYadav, Tripura Governor Tathagatha Roy, Haryana Governor Kaptan Singh Solanki, Arunachal Pradesh Governor JP Rajkhowa leh Governor hlui dang eng emaw zat an tel.