Mithiamte'n Champhaia vawk thi an enfiah

Champhai district-a vawk pûl hri leng mek leh vawk thite a hmuna zir chiang turin AH&Veterinary department chuan Aizawl aṭangin Champhaiah Rapid Response Team for Disease Outbreak a tír.

Nimin khan Champhai leh a chhehvelah vawk thite sample lain an kal kual a, vawk thite chu an endik (post-mortem) bawk.

Rapid Response Team for Disease Outbreak leh Champhai-a Vety officer-te chu nimin khan hmun Champhai khawpui chhungah vawk natna vei leh thi tawh aṭangin tissue leh serum sample an la a; vawk hri lêng hi PRRS a ni tih finfiah tawh mah se, state dang reaserch institute-ah an zir chiana finfiah turin sample ṭhenkhat chu an thawn leh ang. Myanmar aṭanga vawk lak luh dan enfiah turin vawiinah Zokhawthar kal leh an tum a ni.

Vety mithiamte hian May 3, 2016 khan Champhai DC Vanlalngaihsaka an kâwm a; Vanlalngaihsaka chuan, Myanmar aṭanga vawk lak luh leh Mizoram páwna thawn chhuah khuahkhirh a nih tur thu sawiin, "Thupek zâwm lote chu an chungthu ngaihtuah a ni ang," a ti.

Inkawmhonaah hian vawk natna a darh zel loh nan mi tin an fimkhur a
ṭul thu te, natna vanga vawk thite chu leiah phûm ngei tur a nih thu te, phûm loa paih mai mai a nih chuan a ruang eitu ramsate'n natna an put darh theih thute sawi a ni. Vawk thite phûmna tur hmun mumal nei lote tan YMA sub-headquarters, Champhai chuan hmun an siamsak a ni.

AH&Vety officer-te chuan, vawk natna léng chu virus-in a thlen a ni a, taksaa natna dotu (immune system) a tihchhiat avangin natna hrang hrangin a tlâkbuak phah ṭhin tih an sawi a; natna chu ran dang leh mihring pawh pu darhtu an nih avangin fimkhur tlan a pawimawh thu an sawi rualin, mihring hriselna tan erawh a hlauhawm loh thu an sawi.

Champhaia Rapid Response Team kalte chu - AH&Vety joint director Dr Hmarkunga, Vety officer (disease investigation) Dr Esther Lalzoliani leh Dr Jimmy Rosangzela te an ni.