Bru lâk lêtna atan road map peih hnai

Tripura refugee camp-a Bru awm zinga Mizoram khua leh tuite hruai kîr dan tur ruahmanna, road map chu Mizoram sorkarin a siamfel thawhkhat a, hun tiam chhunga peih ngei tum a ni.

Ministry of Home Affairs (MHA) chuan refugee camp-a Bru-te hruai kîrna tur hian road map siam a, chumi anga ruahmanna siam tur leh May 31, 2016 hmaa thehlut turin Mizoram sorkar a hriattir. MHA hriattirna bawhzui chuan Mizoram sorkar chuan road map an siam a, an peih thawkhat tawh a, siam ṭhat ngai leh belh ngaite an buaipui mek a ni.

Hetih lai hian, State Level Core Committee on Bru Repatriation chu an chairman Lalmalsawma, chief secretary hoin tun hnai khan CS conference hall-ah an ṭhukhawm a, thil pawimawh hrang hrang an rel.

Meeting-ah hian member-te chu road map atana rawtna thar siam tur an neih leh neih lohte zawh an nih bakah, Home department additional secretary Lalbiakzama kaihhruaina hnuaiah Sub-Ccommittee din an remti. Sub-Committee-ah hian Security, Medical, Transport leh Supply department aiawhte an tel dawn a; Bru-te lâk kîr an nih huna thil pawimawh tur hrang hrang rawtna an siam ang.

Meeting-ah hian, Home secretary Renu Sharmna, Finance secretary Lalropara, DIG(NR) LT Hrangchal, Mamit DC Lalbiaksangi, Kolasib DC H Lalengmawia, Lunglei DC Abhijit Verma leh district hrang hranga SP-te an tel a ni.