Mipui tana luang chhuak lo bank-te Sumdawnna kalpui tawh lo turin duh

Mizo Students Union (MSU) chuan, mipui tana luang chhuak lo bank-te'n Mizoramah sumdawnna kalpui tawh lo se an duh tih an sawi a, chu'ng bank-te chu dâwr lo ngam turin Mizo mipuite an ngen.

MSU hruaitute hian nimin khan Aizawl Press Club-ah thuthar thehdarhtute an kâwm a; an president PC Lalrinhlua chuan, "Mizoram chhunga bank leh company rawn dinte lak aṭangin Mizo ṭhalai leh zirlaite'n eizawnna bul kan ṭan theihna tur te, kan tana chhenfâkawm leh innghahna tlak ni tura kan beisei lai a, an sum hmuhna tur ringawt an ngaihtuah hi ṭha kan ti lo. Kan ramah hian sumdawnna kalpui tawh lo mai turin kan duh hial a ni," a ti.

MSU President sawi danin, MSU chuan private leh nationalised bank hrang hrangte chu tun hnai kum hnih/thum chhunga an sum che vel dinhmun an zir chiang a, an thil hriat chhuahte chuan a tilawm lo a ni.

Sorkar laipuiin bank-te'n an tihhlawhtlin ngei ngei tur loan, Prime Minister's Employment Generation Programme (PMEGP) a duang a, PMEGP atan hian Ministry of Micro Small and Medium Enterprises (MSME)-in bank hrang hrangte tan bituk a nei ṭhin.

Mizoramah chuan kum 2008-09 aṭangin PMEGP chu KVIC ruahman angin kalpui ṭhin a; tunah hian MSMR-in PMEGP loan-a margin money atan cheng nuai 1253.49 a ruahman a, margin money chu khawpuiah 25% leh thingtlangah 35% sorkarin a tum a ni.

MSU President chuan, PMEGP tihlawhtling duh miah lo bank an awm tih sawiin, "Mizo mipuite sum chauh duh bank an awm hi pawi kan ti tak zet. Kum 2013 aṭangin khan YES Bank, IndusInd Bank, AXIS Bank, UCO Bank, ICICI Bank, Syndicate Bank, Punjab & Sind Bank, South Indian Bank, HDFC Bank leh Federal Bank-te'n PMEGP atana sorkar bituk zah an pe lo. YES Bank, South Indian Bank, IndusInd, Punjab & Sind Bank leh Syndicate Bank phei chuan PMEGP hi kum 2015-16 chhungin an pe duh lo," a ti.

Kum 2014-15 tawpah AXIS Bank, Vijaya Bank, HDFC Bank leh United Commercial Bank-te'n mipui sum deposit cheng nuai sing khat chuang vek an nei tih sawiin PC Lalrinhlua chuan, "Hetiang a nih laia PMEGP an pe ṭha duh lo hi pawi kan ti tak zet. AXIS Bank-in chawh ruala sorkar aṭanga sum an hmuh (deposit amount) cheng nuai 23,309.19 an neih laiin, mipuite tana an luan chhuahna CD ratio chu 11.39% chauh a ni," a ti a; YES Bank phei chuan deposit amount nuai 1582 an neih laiin an CD ration chu 0% a nih thu a sawi.

Zawhna chhangin, private bank-ah sorkar sum fixed-a dah ṭhin a nih thu sawiin MSU hruaitute chuan, "A rukin fixed-in pawisa an dah ṭhin a nih a rinawm. Officer zingah private bank aṭanga car dawngte pawh an awm. He thil pawh hi kan zir chiang dawn," an ti.

MSU hruaitute chuan, kum 2016-17 atan KVIC chuan Mizorama bank hrang hrangte tihhlawhtlin turin PMEGP atan target a siam leh tih sawiin, "Mizoramah company lian leh changtlung ṭhalaite tana innghahna tlak luhchilh tur kan ramah a awm meuh loh avangin bank hrang hrangte hi Mizo mipuite tan an pawimawh hle," an ti a; bank hrang hrangte chu Mizo mipui leh ṭhalaite hmasawnna tura PMEGP atana target an neihte tihhlawhtling ṭheuh turin an ngen a ni.