KHAWTHLIR

Scho la lo tan

Mizoram Scholarship Board (MSB) chuan pawl 11 chin chung lam zirlai, scholarship diltu, an account-a pawisa la lut lote chu an passbook update xerox copy kengin MSB office-ah May 13, 2016 hmaa inhriattir vek turin an hriattir.MSB hotute chuan, scholarship atana account hawn ngaihtuah zui loh vanga thi a tam niin Vanglaini an hrilh a, "Chungho account-ah chuan pawisa a lut thei lo a, chinfel vat kan duh a ni," an ti.

Minister-in enfiah

Industries minister H Rohluna leh parliamentary secretary (Industries) Joseph Lalhimpuia-te chuan, nimin khan Lungleia Skill Developement Training Centre sak mek an tlawh a, hna thawh dan an enfiah. Centre atan hian a thawh khatnaah project cost cheng nuai 116 ruahman a ni a, a thawh hnihnah nuai 89 hmuh leh beisei a ni.

Bike chesualah thi

Thawhlehni zan dar 9 vel khan, Hunthar Venga lei tlahniam bulah gas phur truck-in bike MZ-01 H-8100 a chíl a, bike khalhtu Gordon Lalbuatsaiha (32) s/o Dengzika, Dawrpui Vengthar chu Aizawl Civil Hospital thlenpui a nih hnuah a hliam tuar loin a thi.

EM-in sikul tlawh

LADC executive member i/c middle school, Laltlawmlova Chinzah chuan nimin khan Lawngtlai khawpui chhunga LADC enkawl middle school-te a tlawh a; zirtirtute chu hmasawnna atan an pawimawh tih hria a, zirlaite thiamna tak tak pe tura theihtawp chhuah turin a fuih.

Ruang chhar

Nimin chawhnu dar 3 vel khan, Lawngtlai-III thlânmual thlangah hmeichhe pakhat ruang chhe tawh tak hmuh a ni. Ruang hi police leh mi tlawmngaite'n an senghawi a; a hnuah Biak-thangmawii (46) w/o R Sawikunga, Thingkah, Lawngtlai a ni tih hriat chhuah a ni.