Sikul infintir dan tur ngaihtuah mek a ni - Education Minister
School Education minister H Rohluna chuan nimin khan Lungleia Education Guest House & Training Centre sak tur lungphùm a phúm. Rohluna chuan, sorkar primary school leh middle school,zirlai tlemtê an awm ṭhin chu sâwr zîm dan tur leh sikul ṭhenkhat infintir dan ngaihtuah mek a nih thu a sawi.
Minister H Rohluna chuan, zirna chu Chief Minister-in a ngai pawimawh tih sawiin, harsatna leh mamawh an neihte CM hnena an thlenin a theih ang angin a tihhlawhtlinsak ṭhin tih a sawi a, "Kum hnih chhung lekin infrastructure lamah hma kan sawn nasa a, hmabak tam tak kan la neihte pawh theihtawp chhuaha tihpuitlin kan tum zel a ni," a ti.
School Education department chu sorkar department zingah thawktu tamna ber a nih avangin inenkawlna kawngah pawh harsatna an nei ṭhin tih sawiin, Rohluna chuan, "Inkalpawhna leh inbiakna ṭha a awm tawh a, tun hma ngaihtuah chuan thawktute'n nasa takin hma an sawn tawh a, hmasawn belh zel kan ngai bawk," a ti a; zirna chu a theih chin chinah a ṭha thei ang bera kalpui tum a nih thu a sawi.
H Rohluna chuan, tun hmain subject bik awm loin zirtirtu lak a ni ṭhin a, tunah chuan middle school-ah 33% chu Mathematics leh Science zirtirtu atan dah a nih thu leh, high school-ah 30% dah a nih tawh thu a sawi a; tunah chuan English medium leh Mizo medium sikulte pawh zirlai inang vek zirtir an nih tawh a, NCRT syllabus hman a nih thu a sawi bawk.
Parliamentary secretary (School Education) Joseph Lalhimpuia pawhin thu sawiin, M/S leh P/S thawm ṭhatna tur cheng nuai 100 hmuh a nih thu a sawi a; HSLC leh HSSLC-ah private candidate awm tawh lo tura ruahman a nih thu sawiin, "Nakkum aṭangin sikul zirtirtute'n 20% internal mark an pe tawh dawn a, zirtirtute chu rinawm tak leh taima taka hna te thawk tura beisei an ni," a ti.
Lungphùm phùmna inkhawm hi School Education additional secretary Lalzirmawia chhangte-in a kaihruai a; Education Rest House leh Training Centre sak nan hian cheng nuai 120 hmuh a ni a, Lushai Engineerings-in an sa dawn a ni.