Lawngtlai kawngpui zauh mek enfiah

Lawngtlai khawpui chhunga National Highway-54 zauh hna thawh mek chu, nimin khan District Level Monitoring Committee member-te'n Lawngtlai SDO (Sadar) Lallawmawma hoin an enfiah.

Lallawmawma chuan, Lawngtlai khaw chhung-a NH-54 zauh hna chu tun-ah Central YLA Hall aṭanga Chawngte pêng (Chandmary Square) inkarah thawh mek a nih thu leh a rang thei ang bera zawh tum a nih thu a sawi a, "Chawngte pêng leh 71 RCC Camp inkar zauh hna erawh chu Monitoring Committee-in a thlir hmasak hnuah thawh chhunzawm tur a nih leh nih loh a chiang thei chauh ang," a ti.

Lawngtlai SDO (Sadar) chuan, kawng-pui zauh a nih vanga tui pipe phûm tawh phawrh-sak te, step tihchhiatsak tâkte eng emaw zat a awm tih sawiin, mipuite'n inhawng taka an lo dawnsawn avangin lawmawm a tih thu a sawi.

PWD executive engineer (Highways) Lalrinngheta chuan, Lawng-tlai khaw chhung kawng zauh hna thawh mekah mipuite'n harsatna an siam loh avangin chak takin hna an thawk thei tih a sawi bawk.

NH-54, Lunglei-Tuipang inkar chu siamṭhat hna thawh mek a ni a, Lunglei aṭanga Lawngtlai khaw chhunga CYLA Hall inkar chu Lunglei PWD EE hnuaia thawh niin, GP Project-in an thawk a; CYLA Hall aṭanga Tuipang inkar chu RDS company-te'n an thawk a, anni hian Lawngtlai khaw chhung bakah, Saiha Zero aṭanga Tuipang inkarah hna an thawk mek a ni.