MPC president-ah Lalhmangaiha thlang nawn

MPC party chuan nimin khan an pisaa Durbar Hall-ah General Assembly an hmang a, kum 2016-19 chhunga MPC general headquarters hruaitu thlangin, president-ah Lalhmangaiha Sailo an thlang nawn.

MPC Assembly hi executive vice pre-sident Dr Kenneth Chawng-liana'n a kaihruai a; pre-si-dent Lalhmangaiha Sailo chuan thu sawiin, "Kan ram siamṭha a, hma-sawnna kalpui turin ṭawngkam thiam leh sawi tlawr ringawtah a innghat lo a, vote zawn nana mipuite hnena thil sem ringawtah a innghat hek lo. Pathianin min pek thiamna leh theihna ka neih ve angte theihtawp chhuaha ka thawh vena kawngah India ram ropui tak mi hriat nihna ka chan hi ṭangkai taka ram leh mipui tana hman hi ka thupui ber a ni," a ti.

Congress leh MNF-te'n kum 30 chhung Mi-zo-ram an hruai tawh-naah, an inpekna leh thawhrimnate fakawm a tih rualin, a ngaihna an hriat tâwk loh avangin state dangte hmasawnna Mizoramin a phâk lo hle tih a sawi a, "Eirukna leh hlemhletna lamah kan langsar a, party bil induhsakna, chhungkhat laina leh thiltithei fálte inchhek arbawmna a hluar hle a, kan ram leh hnam mualpho takin min siam a ni," a ti a; huapzo sorkar siam turin theihtawp an chhuah zel tur thu sawiin, mipui ṭawiawmna a ngen.

MPC General As-sembly-ah hian kum 2016-19 chhunga office bearer turte an thlang a; president Lalhmangaiha Sailo, vice president-ah Vanlalhlana leh treasurer-ah Michael Lalthanmawia te an thlang a ni.