KHAWTHLIR

Thisen pe

Luangmual branch YMA chuan nimin khan Aizawl Civil Hospital tan thisen unit 43 an pe a, a petute mipa 30 leh hmeichhia 13 an ni.

Hri danna pek dan tur sawiho

Lawngtlai District Task Force on Mission Indradhanush chu nimin khan Lawngtlai DC A Muthamma hoin a pisaah an ṭhukhawm a; hri danna pek beihpui indradhanush phase 3, round 2 kalpui dan tur an rel. Lawngtlai district-ah hian May 2016 chhunga hri danna pek beihpui round 2 kalpui turah khaw 55-ah kum 2 hnuai lam naupang 978 leh nu naupai 264 hnenah vaccine pek tum a ni.

SEC tihdikna

Mizoram State Election Commission (SEC) chuan thuchhuah siamin, Mara Autonomous District Council (MADC) huam chhunga village council ṭhiah taka bye-election neihna tura notification an tihchhuah a, nomination thehluh hun hnuhnung May 9, 2016 chawhma dar 11 aṭanga tlai dar 4 thleng tih chu, tlai dar 3 thleng tur a nih thu an tarlang.

MJA leh IPR Minister

IPR minister Lal Thanzara chuan nimin khan a pisaah MJA hruaitute léngah sâwmin, thil pawi-mawh hrang hrang a sawipui. MJA hruaitute'n an harsatna leh mamawh hrang hrang an sawite chu a theih ang anga bawhzui a tum thu Lal Thanzara chuan a lo hrilh.

Saphu kâwr man

Kolasib police leh Thingdawl NGO ṭangkawp chuan nimin zing khan Thingdawl-ah Silchar maxicab, Aizawl lam pan aṭangin saphu káwr kg. 123 leh a neitua puh Vanlalena (44) s/o Lalsiamthanga, Tahan, Myanmar an man a, Wildlife Protection Act hmangin thubuai siamsak a ni. Vanlalena chuan saphu kâwr chu Silchar-ah Rs. 16,000-a a lei a nih thu a sawi.