CS hoin oil zawn mek sawiho

Ministry of Petroleum & Natural Gas (MPNG) director Nalin Kumar Srivastava leh Central Public Sector Enterprises aiawhte chuan, nimin khan CS conference hall-ah chief secretary Lalmalsawma an kâwm a; an hmalak tawh chinte hrilhin, a theih ang anga pui turin an ngen.

Nalin Kumar Srivastava chuan, ram leilungin a zir loh avangin Mizoramah duhthusamin hna an thawh chak thei lo tih a sawi a, "Zir chian ngaite zir chian a nih hnuah a aia chak zawka an kal theih ka beisei. Thla thum danah sorkar hotute leh company aiawhte inhmukhawm thei se a ṭhat ka ring," a ti.

Indian Oil Corporation (IOC) executive director Dipankar Ray chuan, gas (LPG) hnianghnâr zawka an sem chhuah theihna atan bottling plant thar siam an mamawh thu sawiin, "Kan neih sa hi a hmunhmain a zir loh avangin Sairangah hmun záwl leh zau ṭha an zawn mek a ni," a ti a; rélin bottling plant thleng raw material a phurh theih hunah chuan harsatna sutkian theih a nih a beisei thu a sawi.

Oil India director S Mahapatra chuan, Keifanga oil leh gas zawn hna an thawk mek chu metre 3,500 laih turah metre 2,700 an laih tawh thu sawiin, "Hmun hrang hrang aṭangin lei sample-te la in an enchhin mek zel a ni," a ti.