MST bus chesualah mi 19 hliam

Nimin zing dar 7:30 vel khan Aizawl leh Tuipuibari inkara tlan MST bus chu Tuipuibari leh Damparengpui inkar, Tuipuibari aṭanga km. hnih leh a chanve velah chesualin, kawng thlang ft. 50 velah a tla a; thi an awm lo a, mi 19 an hliam.

Mamit aṭanga thu dawn danin, bus chesuala hliamte chu West Phaileng damdawi-in panpui an ni a, an zinga mi pali chu x-ray turin Aizawl lamah thawn niin, mi dang zawng chu first aid pek hnuah hawtir an ni.

Bus-ah hian driver leh conductor nen mi 25 an chuanga hriat a ni a, an chetsualna hi kawng ngîl lai tak niin, chetsual chhan hriat theih a ni rih lo.

Hliamte West Phaileng damdawi-ina enkawlna senso leh Aizawl lam panpuite phurhna sensote chu minister John Rotluangliana'n a tumsak a, hliam na zual pahnihte Rs. 1,000 ve vein a kan.

Chetsualna hmun aṭanga West Phaileng damdawi-in panpuina leh hliam na vak lote an khua thlenga hruaina senso chu West Phaileng SDO(C) Lalvenhima'n a tumsak.

May 5, 2016 zan dar 10 vel khan Sumsuih khaw daiah maxicab, AS-11 AC-9303 chu kawng laiah a let a; mi pali hliamin, pakhat a na deuh. Motor hi a ṭhat tawk loh avangin Sumsuihah an siam a, an siam zo an tlan leh chu Midum Kham kawngpuiah an chesual ta nia thu dawn a ni.