KHAWTHLIR

Kohhran din

Mizoram Presbyterian Kohhrana Synod Pas-toral Committee chu Sy-nod Office-a JM Lloyd Hall-ah a ṭhukhawm a, member 130 zinga 104 kalin, Synod moderator Rev. H Lalrinmawia'n a kaihruai. Meeting-ah hian Mumbai, Delhi leh Dehradun-ah Presbyterian Kohhran din a nih thu tarlan a ni.

Current man thi

Laltlanthanga (13) s/o Laldarhzaua, Pamchung khua, Champhai Kahrawt Venga cheng mek chu nimin khan current-in a man a, damdawi-in panpui a nih hnuah a thi. Thu dawn danin, Laltlanthanga hi an sikul bula power sub-station chhungah a lut a, electric current-in a man a ni.

NLUP sem

Kolasib-a AH&Vety department chuan, nimin khan NLUP hnuaia ar vulh thlangtu mi 166 hnenah ṭanpuina sum Rs. 20,000 ṭheuh an sem. Nimina NLUP ṭanpuina dawngtute hi a hmain ar-in sakna tur Rs. 10,000 ṭheuh an pe tawh a ni.

Hnatlangin tifai

Nehru Yuva Kendra (NYK), Lunglei leh Pukpui branch YMA-te chuan, nimin khan an huam chhunga vantlang inthiarna, zin veivâk leh khualzinte'n an hman ber tifaiin an hnatlang. Hnatlangah hian Pukpui branch YMA member 13 leh NYK, Lunglei volunteer parukte an thawk chhuak a ni.

Mothers' Day

Naktuk, May 8 hi Mo-ther’s Day (Nute Ni) a ni. Salvation Army-a corps hrang hrangte chuan Mothers' Day pual hian hun an hmang ang.

ZRUCC member

North East Frontier Railways chuan N Joshua, JR Constructions chu Zonal Railway Users Consultative Committee (ZRUCC) member atan tun hnai khan a ruat. N Joshua hi ZRUCC member-ah hian September 30, 2017 thleng awm tura tih a ni.