MESA-in technical session hmang

Mizoram Engeneering Service Association (MESA) chuan, nimin khan Saikuti Hall, Lungleiah Annual Conference vawi 36-na hman chhunzawmin, technical session hun an hmang a; Lunglei High Powered Committee vice chairman S Laldingliana'n a hmanpui.

S Laldingliana chuan, engineering department-te hna thawh nasatzia a lang nia sawiin, an hnathawhte avangin Mizoramah hmasawnna tam tak a awm niin a sawi a, "Tunlai engeneer-te chu an hnaah an tui a, a sûr a sa hnuaiah field-ah lutin hna an thawk a, an inpekna a sang hle. Tunlai technology milin hna an thawk tak tak ta a ni," a ti.

Engineer-te chu thawhhona ṭha leh hriatthiamna ṭha nena an thawh chuan ramin hma a sawn phah ngei a rin thu sawiin, S Laldingliana chuan, "Engineer-te hnathawhte hi mipuite'n thinlung nen lo hmuak thei ila a ṭhat ka ring," a ti a; a tichhetu ni lo turin mipuite hnenah zirtirna pek a ṭhat tur thu a sawi bawk.