Serchhip district-a SSA hnathawh thlirho

Kum 2016-17 atana Serchhip District Education Committee chu, nimin khan a vawi khat nan an chairman Dr Lalrozama, Serchhip DC hoin a pisaah an
ṭhukhawm a; kum 2015-16 chhunga hmalaknate leh sum hman dante an thlirho.

SSA Serchhip district deputy DPC R Lalawmpuia'n a tarlan danin, kum 2015-16 chhung khan Serchhip district-a SSA hnuaia zirtirtute chu April, 2016-ah an hlawh pek kim a ni a; zirlai 4,420 tan school uniform grant cheng nuai 17.68 hmuh niin, School Management Committee hnenah pek chhuah tawh a ni. Zirlaibu a thlawna sem chu subject ṭhenkhatah indaih lohna vangin sem kim loh a ni thung.

Sorkar sikul leh sorkar ṭanpui sikul, P/S leh M/S 135 hnenah School Grant pek a ni a; P/S pakhat tan Rs. 5,000 leh M/S pakhat tan Rs. 7,000 ṭheuh pek a ni a; sorkar P/S leh M/S 125 hnenah Maintenance Grant Rs. 7,500 ṭheuh pek a ni.

Intervention of Children With Special Need aṭangin Rs. 13,79,700 hmuh niin, sikul hrang hranga zirlai 293-te hriselna dinhmun enfiahtir a ni a; tarmit mamawh naupang 193 hnenah a thlawnin tarmit pek niin, CWSN naupang 42 sikula hruai ngaite hnenah Escort Allowances thla 10 chhung atan Rs. 2,500 ṭheuh pek a ni. SSA leh TATA Trust-in Grassroot Football Academy Training Centre 60 a din turah Serchhip district-ah pasarih din tur a ni bawk.