Himpuia'n MIGAHTA khawmpui a hmanpui

Mizoram Govt. Adhoc Aided High School Teachers Association (MIGAHTA), Lunglei district chuan nimin khan YMA Sub-Headquarters, Lunglei Hall-ah Conference vawi 3-na an hmang a; parliamentary secretary (School Education) Joseph Lalhimpuia'n a hmanpui.

Joseph Lalhimpuia chuan, sorkarin zirna kalphung a siam rem mek zel tih sawiin, tuna sikul kum
ṭan thar leh tâkah pawl 5 chin hnuai lamte zirlaibu a thlawna pek vek an nih thu a sawi a, "Zirtirtu lak danah recruitment rules siam ṭhat a ni a, high school bikah subject teacher - maths leh science-ah 30% dah a ni. Tun hnaia zirtirtu 102 lakah pawh 34 chu maths leh science zirtirtu atan lak an ni," a ti.

Sikul leh hostel duh duha din theih a ni tawh dawn lo tih sawiin, Lalhimpuia chuan, "Guideline fel tak siam a ni a, din duhte chuan sorkarah phalna an dil ang a, sorkarin a endik hnuah chauh phalna pek an ni tawh ang," a ti a; Board exam-ah private candidate neih phal tawh loh a nih tur thu a sawi.

Joseph Lalhimpuia sawi danin, Mizoramah adhoc aided sikul 129 awmin, zirtirtu 903 an awm a; Congress party-in sorkar na an chan hnuah sikul dinhmun sang zawka dah (upgrade) a awm lo.