Lok Sabha MP tur thlan a ni dawn ta

Mizorama Lok Sabha inthlanpui chu vawiin hian neih a ni dawn ta a, zing dar 7 aṭanga tlai dar 5 thleng vote thlâk hun hawn a ni. Election department chuan vote thlâk vek turin Mizorama vote nei zawng zawng an ngen.

Parliamentary constituency no. 1 - Mizorama tun ṭuma inthlanah hian voter 8,56,364 an awm a, mipa 4,14,805 leh hmeichhia 4,41,559 an ni a, mipa 1,000 zelah hmeichhia 1,064 an awm ang a ni. Heng bakah hian service voter 4,963 (mipa 4,872 leh hmeichhia 91) an awm bawk. Voter zingah rualbanlo mi 3,397 leh kum 85 chung lam 4,741 an awm.

Tun ṭum inthlanah hian candidate paruk an awm a; chu'ngte chu - Vanlalhmuaka (BJP), Lalbiakzama (INC), K Vanlalvena (MNF), Richard Vanlalhmangaiha (ZPM), Rita Malsawmi (PC) leh Lalhriatrenga Chhangte (Independent)-te an ni.

Inthlanah hian voter-te'n vote an thlâk vek theih nan Mizoram sorkar chuan vawiin hi public holiday-ah a puang a; sorkar hnathawk ni lote tan pawh chawlh theih niin, hlawh kiam chuang loa chawlh ni, paid holiday atan puan a ni.

Kumin Lok Sabha MP thlanna atan hian polling station 1,276 siam a ni a, polling station 751 chu thingtlang (rural)-a awm niin, 525 chu khawpui (urban)-ah a awm.

Inthlana duty tur polling party tam zawk chuan nimin khan an duty-na tur polling station an pan a; hmun hla deuha duty tur polling party-te erawh chuan April 17, Nilaini khan an duty-na tur an pan tawh. Mizoram pumah polling station enkawltu tur polling official ruat mi 5,071 an ni.

Inthlanah hian polling station zawng zawngah electronic voting machine (EVM) bakah, voter verifiable paper audit trail (VVPAT) hman a ni dawn a; ECIL siam M3 model thar ber ballot unit 1,994, control unit 1,958 leh VVPAT 2,088 hman a ni ang. Sorkar thuchhuah chuan, EVM/VVPAT leh mihringah indaih lohna a awm lo tih a tarlang.

Inthlana venhimna kengkawh turin state police mi 3,553 leh central armed police force (CAPF) company 12 hman an ni. CAPF company panga (CRPF vek) chu inthlan zawhah strong room leh counting centre-te veng turin Mizoramah an awm tlang dawn a, a bak company pasarih (CRPF leh BSF company pahnih ve ve leh, ITBP company pathum)-te chuan inthlan zawhah Mizoram an chhuahsan ang.

Inthlan vil turin flying squad team 83 leh static surveillance team 81 din a ni a, check post (Nakas) 52 siam niin, chu'ng zinga 12 chu state ramri-ah a awm.

Lok Sabha inthlanaa vote tlate chu June 4, 2024-ah India ram hmun dang ruala chhiar a ni dawn a; vote tlate chu district election official-te'n an district ṭheuhah an chhiar dawn. Aizawl bikah chuan, MP inthlana vote tlate Aizawl DC Office, Assembly Annexe leh Aizawl College, Sikulpuikawnahte chhiar a ni ang.

Mizoram Election department chuan, inthlanna huapzo, muanawm, felfai, dik leh langtlang, India ram pum tana entawn tlak siampuiah Mizoram mipui an sáwm a; khua leh tui nihna anga mawhphurhnate hlen chhuaka vote thlak ṭheuh turin voter-te an ngen a ni.