Mizoram puma home voting-ah mi 2,109-in vote an thlâk

Kumina Lok Sabha inthlanah polling station-a kal harsatte tan an in lama vote thlaktirna (home voting) kalpui a ni a; mi 2,109-te vote thlaktir a ni.

Home voting dilte vote thlaktir turin district hrang hranga mobile polling team-te chuan April 4-15, 2024 chhung khan home voting phalsakte chu an inah kalchilhin vote an thlaktir a; mi 2,109 vote thlaktir niin, kum 85 chung lam mi 1,792 leh rualbanlo mi 317 an ni.

Tun ṭum Lok Sabha inthlana voter 8,56,364 zingah kum 85 leh a chung lam mi 4,741 awmin, mipa 2,167 leh hmeichhia 2,574 an ni a; rualbanlo mi 3,397 awmin, mipa 1,876 leh hmeichhia 1,521 an ni. Young voter an tih, kum 18-19 mi 36,370 (mipa 18,659 leh hmeichhia 17,711) an awm bawk.