MSCW chairperson atan kum over tawh ruat a ni - MSU

Mizo Students’ Union (MSU) hruaitute chuan, Mizoram State Commission for Women (MSCW) chairperson atana sorkarin a ruat C Lalchhandami chu chairperson ni thei chin kum a pêl tawh niin an sawi a; chairperson atana ruat a nihna sût turin sorkar an phût.

MSU hruaitute hian nimin khan an pisaah thuthar thehdarhtute an kâwm a; "MSCW chairperson atana ruat Pi C Lalchhandami hi danin kum bithliah a siam ang tlin tawh lo a nih avangin appointment notification hi a rang thei ang bera sût leh thuai turin sorkar kan ngen," an ti.

MSU hruaitute sawi danin, Planning & Programme Implementation department-in RTI Act tlawhchhana zawhna April 15, 2024-a an chhannaa a lan danin, MSCW chairperson atana ruat C Lalchhandami, AMC corporator chu March 31, 2016-ah sorkar hna aṭangin superannuation pension-in a chhuak tawh.

MSCW chairperson chu ruat a nih aṭanga kum 3 chhung emaw, kum 65 tlin thleng emaw, khawi emaw zawk zawk chhung hna a chelh thei ang tih a ni a, chu chu bawhchhiat a ni.

C Lalchhandami chu a pension kum aṭanga chhûtin tunah kum 68 a ni tawh tih sawiin MSU hruaitute chuan, "Kum 2021 AMC inthlan laia pamphlet-a a kum tarlan aṭang pawhin kum 66 a ni tawh hrim hrim. Heti chunga March 8, 2024-ah MSCW chairperson atana ruat a nih hi hriatthiam har kan ti," an ti.

MSU hruaitute chuan, dan ding lai kalha inruat chu induhsakna vang liau liauah an ngaih thu sawiin, "Dikna tun din nan notification hi a rang thei ang bera sût leh turin kan ngen. Dan ang ngei a nih theihna turin a tawp thlengin hma kan la dawn," an ti a; an hmalakna thláwp turin mipui leh zirlaite an sáwm.