Polling official mi 5,071 an awm; an duty-na tur an thleng kim

Mizorama Lok Sabha MP thlan tura duty tur polling party tam zawk chuan nimin khan an duty-na tur polling station an pan a; hmun hla deuha duty turte chuan April 17, Nilaini khan an duty-na tur an pan tawh thung. Mizoram pumah polling station enkawltu tur polling official ruat mi 5,071 an awm.

Mizoram pumah polling station 1,276 a awm a, chu'ng zingah 751 chu thingtlanga awm niin, 525 chu khawpuia awm a ni. Polling station hi hmun hrang hrang 1,166-ah siam a ni a, chawhrualin polling station pakhatah voter 671 zel an awm ang a ni. Polling station 765-ah polling booth-a chêt velnate webcasting kaltlanga vil a ni dawn.

Polling station 1,276 enkawltu tur polling party zinga polling station hla deuh 168-a duty turte chuan April 17 khan an district headquarters aṭangin an duty-na tur an pan a; polling station dang 1,108 vil turte chuan nimin khan an enkawl tur PS an pan thung.

Venhimna uluk lehzuala kalpui ngai (vulnerable polling station) 14 a awm a; Kolasib district-ah pasarih, Champhai district-ah pali leh Aizawl district-ah pathum a ni. Critical polling station panga awmin, Saitual district-a mi vek a ni a; critical PS hi vote tla 90% aia tam a niha candidate pakhatin vote tla aṭanga 75% aia tam a hmuhnate a ni.

Lirthei luh lohna, kea pan ngai polling station 11 a awm a, Mamit district-ah paruk, Lunglei district-ah pali leh Lawngtlai district-ah pakhat a ni. Lawngléng hmanga pan ngai polling station 15 (Lunglei district-ah 13 leh Mamit district-ah pahnih) a awm bawk.

Mizoram pumah model polling station 25 a awm a; hmeichhia vekin an enkawl - all women managed polling station (Pink PS) 136, ṭhalai vekin an enkawl - all youth managed polling station pasarih leh rualbanlote'n an enkawl - PwD managed polling station pakhat a awm. Lunglei district-ah auxilliary polling station pali a awm bawk a ni.