Bawrhsapin fimkhur turin mipui a chah

Sorkar laipui Ministry of Earth Sciences hnuaia India Meteorological Department (IMD)-in khawchin a thlir lâwknaah tun kar chhoah Mizoram hmun ṭhenkhatah thli leh ruah a thawh theih thu tarlan a ni a; Aizawl District Disaster Management Authority (ADDMA) chairman Nazuk Kumar, bawrhsap chuan fimkhur turin mipui a chah.

Aizawl Bawrhsap chuan, Aizawl district-a local/village disaster committee-te chu an khua/veng ṭheuhah a ṭul anga hma la tur leh inkaihhruainna tarlante puangzar turin a ngen a, "Khuarel chhiatna a thlenin District Emergency Operational Centre toll free number 1077-ah engtik lai pawha biak theih a ni a, eng emaw vanga line a tlang thei lo a nih pawhin bialtu zonal officer-te hnenah chhiatna thlen thu hriattir theih a ni," a ti.

AIZAWL DDMA THUCHHUAH
1. Thli leh ruah thawh hmaa tih tur leh tih loh turte:
¤ Mahni in leh lo, office building leh hna thawhna hmunte’n thli leh ruah a dâwl zawh theih nan a ṭul anga thawm ngai laite thawm ṭhat tur.
¤ Thing leh mau thliin a len tlûk theih, electric wire delh mai theite chu kih emaw, a zâr thlak tur a ni.
¤ Thlipui leh ruah vanga current neih loh theih a nih avangin mobile phone leh electric bungrua charge theihte chu charge full sa vek tur.
¤ Tuihâwk luankawrte then fai tur a ni.
¤ Lei laih lai neite tan leimin a thlen loh nan hnathawh zawhah uluk taka khuh tur.
¤ Tukverh leh kawngkhar nghet taka khar tur a ni.

2. Thli leh ruah thawh laia tih tur leh tih loh turte:
¤ Electric bungrua leh khawlte off vek tur a ni.
¤ Lirthei reng reng garage-ah him taka dah tur.
¤ Mahni in chhuahsan loh tur a ni a, in chhungah tawm him tur a ni a, chî-ài loh tur.
¤ Tuihâwk luankawr bul hnaiah kal loh tur a ni.
¤ Thli leh ruah thawh laiin luiah leh lui hnaihah kal loh tur.