Mamitah thubuai 34 ziak lut tawh

Lok Sabha inthlanpui puan a nih aṭanga Model Code of Conduct (MCC) kalpui a nih hnuah Excise & Narcotics department (END) chuan Mamit district-ah ruihhlo eng emaw zat an man tawh a, ruihhlo man kaihhnawihah thubuai 34 ziak lutin, mi 28 an man.

March 16, 2024-a MCC puan a nih aṭanga April 17, Nilaini thleng khan Mamita END chuan rakzu litre 232.525, zu bilh lai ṭín 851, zu thlawrna bél 27, heroin gram 37.930, Nap-10 gram 3.200 leh ganja gram 10 an man tawh a ni.

Mamita END assistant commissioner Lalsangzuala Ralte chuan, zu leh ruihhlo donaah kohhran ṭhalaite leh tlawmngai pawl hruaitute thawhpuina ṭha tak an dawn avangin an lawm thu a sawi a, "Sorkar thawhpui zel turin ka sáwm nghal. Mamit district-a heroin lut tam ber hi Badur (Tripura) leh Satmara (Assam) aṭangin a ni a, lo dang chat turin END-te'n theihtawp chhuahin hma kan la mek a ni," a ti.