KHAWTHLIR
Rs 4,79,84,035 hû ruihhlo man
Lok Sabha inthlan puan a nih veleha Model Code of Conduct hman a nih aṭanga April 15, 2024 thleng khan Mizoramah zu leh ruihhlo dang Rs 4,79,84,035 hû man a ni. Silai pariat leh a mu eng emaw zat bakah, gelatin 110 leh detonator 110 man a ni bawk.
Chenna in paruk chhia
April 17, Nilaini tlaia thli tleh vangin Meidum, Kolasib district-ah chenna in paruk a chhia. In chhia paruk zinga pathum chu thliin a chung a hlîp a, pakhat chu in bula thing tluin varanda a vaw chhia a, a dangte chu a bang thliin a chhêm tlakte a ni. In chhiate chu nimin khan Meidum Village Council leh YMA hmalaknain thawm ṭhat a ni.
Bomb-a sangha mantu man
Nimin zing dar 6:30 vela Tlawng lui, Lidung sei, PHE tui pump-na chhak lawka bomb hmanga sangha mantu Andy Malsawmtluanga, Maubawk, Aizawl chu police-in an man. YMA, Maubawk Branch-in FIR an thehluh bawhzuiin police-te'n Andy Malsawmtluanga an man a, a hnen aṭangin gelatin pathum, detonator paruk, gelatin fuse bakah thil dang man a ni.
AR-in heroin man
Assam Rifles sipaite chuan April 17, Nilaini khan Champhai district-a Ngur leh Ṭiau inkar kawngah mi pakhat hnen aṭangin heroin gram 26 an man a, Champhai police kutah an hlan. Heroin an man hi Rs 18,20,000 hû a ni.
Ruihhlo vangin mi 27 thi tawh
Excise & Narcotics department chhinchhiah danin, kumin January 1 aṭanga April 12 thlengin ruihhlo vangin Mizoramah mi 27 an thi. Ruihhlo vanga thi mi 27 zinga 21 chu mipa an ni a, paruk chu hmeichhia an ni. Mi 18 chu heroin vanga thi an ni a, mi pariat chu heroin leh ruihhlo dang tih pawlh vanga thi an ni. Alprazolam leh ruihhlo dang tih pawlh vanga thi mi pakhat a awm bawk.