Lok Sabha inthlan tluang taka neih a ni; tlai dar 5:00 thlengin vote 56.68% a tla

Parliamentary Constituency no. 1 - Mizorama Lok Sabha General Election 2024 chu nimin khan Mizoram pumah buaina leh harsatna lian tham awm loin neih a ni a, nimin tlai dar 5:00 thlenga hriat theih chinah vote 56.68% a tla.

Mipui tana vote thlâk hun hawn a nih hma, zing dar 6:30 aṭangin polling official-te'n mock poll neiin, vote an thlâk chhin. EVM a ṭha a ni tih finfiah hnuah mock poll-a vote tlate paih a ni a, chumi hnuah zing dar 7-ah mipui tan vote thlâk hun hawn a ni. Harsatna eng emaw vanga zing dar 7-a vote thlâk ṭan theih lohna polling station a awm nual bawk.

Polling station tam takah chuan zing dar 7 aṭanga tlai dar 5 thleng vote thlâk hun hawn a ni. Thu dawn danin, tlai dar 5-a vote thlâk zawh hman loh vanga hun tiam pelh hretna polling station tlem azáwng a awm. Hmun ṭhenkhatah electronic voting machine ṭhat loh vangin vote thlâk a khaihlak a, harsatna lian tham erawh a awm lo.

Tun ṭum inthlanah hian candidate paruk an awm a; chu'ngte chu - Vanlalhmuaka (BJP), Lalbiakzama (INC), K Vanlalvena (MNF), Richard Vanlalhmangaiha (ZPM), Rita Malsawmi (PC) leh Lalhriatrenga Chhangte (Independent)-te an ni.

Vote thlâkna polling station hrang hrangte chu candidate-te'n an tlawh kual a; returning officer Nazuk Kumar, Aizawl DC pawhin Aizawla polling station hrang hrang a tlawh kual a, DC Office-a inthlan lam buaipuitu officer-te'n an ṭawiawm.

Governor Dr Hari Babu Kambhampati chuan nimin zing khan Venghlui Polling Station-ah vote a thlâk a, chief minister Lalduhoma'n chawhma dar 10-ah Chawlh­hmun Polling Staton-ah vote a thlâk bawk.

Mizoram puma polling station hrang hranga polling party-te chuan vote thlak zawhah vote thlâkna khawl EVM leh VVPAT-te chu an district headquarters ṭheuh an panpui nghal a; polling party tam zawk chuan nizan khan hmunpui an thlenpui. EVM-te chu endik hnuah strong room-ah dah nghal a ni.

Inthlana vote tlate chu June 4, 2024-ah India ram hmun dang ruala chhiar a ni dawn a; vote tlate chu district election official-te'n an district ṭheuhah an chhiar dawn. Aizawl bikah chuan, MP inthlana vote tlate Aizawl DC Office, Assembly Annexe leh Aizawl College, Sikulpuikawnahte chhiar a ni ang.

Tarlan tawh angin, tun ṭuma Lok Sabha inthlanah hian Mizoramah voter 8,56,364 awmin, mipa 4,14,805 leh hmeichhia 4,41,559 an ni a, service voter 4,963 (mipa 4,872 leh hmeichhia 91) an awm bawk.

Polling station 1,276 siam a ni a, polling station 751 chu thingtlang (rural)-a awm niin, 525 chu khawpui (urban)-ah a awm a; polling station-te enkawltu turin polling official mi 5,071 ruat a ni.

Lok Sabha inthlanah hian nimin zing dar 9 thleng khan vote 17.59% chiah a la tla a, vote tlâk tawh dan enin, Election department hotute chuan vote a tlâk ṭhat loh an hlauthâwng a, Aizawl Press Club-ah press conference neiin, ṭhahnemngai lehzuala vote thlak turin mipui an ngen nawn.

Chief electoral officer (CEO) Madhup Vyas chuan, Mizoram mipuiin vote an neihte an ngaihhlut a, vote thlâk an ngaih pawimawh a ṭul thu sawiin, "Ṭhahnemngai zawka vote kan thlâk a ngai. Vote nei zawng zawngte'n vote an thlak ngei theih nan sorkarin chawlh a puang hial a ni," a ti a; chawlh puan a nih chhan ang taka vote thlâk turin mipui a ngen.

Addl. CEO H Lianzela pawhin "Vote thlâk tawh dan enin, kum hmasa lam aiin kan ṭha dawn lo deuhin a lang a, ṭhahnemngai lehzuala vote thlâk turin mipui kan ngen nawn leh a ni," a ti. Dawr inhawng, mi dang chhawrte pawhin an naute'n vote an la thlâk lo a nih chuan vote thlâk tura hawtir turin a ngen a, "Vote thlâk hun tàwp lamah kan inhnawh khawm ṭhin a, hun tàwp lam i nghak kher lo ang u," a ti bawk.