Vangchhia Polling Station-a duty police a thi

Nimina Lok Sabha inthlana venhimna hna thawka duty constable Lalrinpuia (28) s/o JMS Dawngliana, Kawlkulh chu nimin zing dar 4:45 khan a duty-na hmun, Vangchhia khuaah thia hmuh a ni a, nimin vêk khan vui a ni.

Thu dawn danin, Lalrinpuia hi 2nd IR police a ni a; nimin zing dar 4:45 khan a thawhpuite'n an kaitho dawn a, a lo thi tawh. A ruang chu nimin chawhma dar 11 vel khan Champhai District Hospital-ah endik a ni a, tih tur ṭulte tih zawh hnuah district election officer James Lalrinchhana, SP Vineet Kumar leh official dangte'n an thlah liam. Nimin tlai khan an khuah vui a ni.

DEO James Lalrinchhana chuan, inthlana venhimna hna thawktu Lalrinpuia a thi chu pawi a tih thu sawiin, a chhungte a tawrhpui tak zet thu a sawi a; chhiattawh dan chu Chief Electoral Officer hnenah a hriattir nghal a, election duty laia thite ràlna a rang thei ang bera a chhungte'n an dawn theih nan an buaipui thuai tur thu a sawi bawk.

Champhai SP Vineet Kumar pawhin thu sawiin, Lalrinpuia a thi chu pawi a tih thu leh Police tan chànna nasa tak a nih thu a sawi a, "Police tana a hnathawhte hriatreng a ni tawh ang," a ti. Lalrinpuia ràlna hmasa atan a chhungte hnenah Champhai DEO office chuan Rs 5,000 an hlan a ni.

Lalrinpuia a thih tâk avang hian amah thlâk turin Champhai SP ruahmannain police dang dah nghal a ni a, vote thlâk leh venhimna thilah harsatna a awm lo.