Ram dan leh khawtlang inrêlbàwlna zâwm turin CYMA-in râltlânte a chah

Myanmar, Bangladesh leh Manipur aṭanga Mizorama ráltlân awm mekte chu Central YMA chuan ram dan leh khawtlang inrêlbàwlna zâwm turin a chah a; sorkar leh khawtlang duh lo thila inhnamhnawih lo tur leh, an duh duhna hmuna insawn kual phal a nih loh thu a hriattir bawk.

CYMA chuan, "Mizoram chhunga Myanmar, Bangladesh leh Manipur aṭanga Zo fa unau sahimna zawnga rawn lut zawng zawngte'n Mizorama an awm chhungin ram dan leh khawtlang inrêlbàwlna an zâwm tur a ni a, ram leh khawtlang duh loh záwngin an awm tur a ni lo," an ti.

YMA branch, group leh sub-headquarters-te chu an huam chhunga ráltlânte dinhmun zir chiang a, vil reng tura beisei an nih thu CYMA chuan a tarlang a; ráltlânte chu Zo unaute an nih avangin ṭanpui an ngaih chuan theihtawp chhuaha ṭanpui turin a ngen bawk a ni.

CENTRAL YMA TARLAN DANGTE

◆ Raltlante hi sorkar leh khawtlang duh loh thil sumdawnna leh ruihhlo lakah an inhnamhnawih tur a ni lo a, khua leh tui ṭha tak anga khawsa tura beisei an ni.

◆ Raltlante'n sorkar hriatpuina leh phalna lo chuan ram leh in an neih theih loh avangin, hetiang lo nei/neih tum an awm pawhin YMA-in hriatpuina a ziahsak thei lo ang.

◆ In leh dawr luah man chungchangah, mi luah lai a man sang zawka luahlan emaw, luahsak emaw tih loh tur a ni.

◆ Myanmar leh Bangladesh aṭanga raltlante hi India khua leh tui an nih loh avangin, India khua leh tuite chauhin an neih tur - voter ID, Aadhaar card, birth certificate, tribal certificate, residential certificate, driving licence, vehicle registration, etc. neih tumin hma an la tur a ni lo.

◆ Danin a phal loh thil sumdawnna leh ruihhlo do kawngah theihtawpin sorkar leh khawtlang an thawhpui tur a ni.

◆ Raltlante hi raltlan an nih ang ngeiin duh duhna hmuna insawn kual lo a, an awmna hmuna awm reng tura beisei an ni.