Tlin theihna ka nei - Lalbiakzama

Mizoram Lok Sabha inthlanpuia Indian National Congress (INC) candidate Lalbiakzama chuan, Congress party mite vote a pelhè tawh dawn loh avang leh a ṭhian ṭhate leh amah lainattute zarah MP atan tlin theihna a nei a, tlin theih a inrin thu a sawi.

Lalbiakzama hian nimin zinga Model Veng Polling Station-a vote a thlak zawha Vanglaini palai zawhna chhangin, "Tunah chuan MLA inthlan ang kha a ni lo a, kan beisei dan chuan Congress chhungkaw vote hi a pelhé tawh lo turah kan ngai a, chutiang a nih chuan, ṭhian ṭhate leh min lainattute zarah tlin ve theihna kan nei tih hi ka ring tlat a ni," a ti.

MP ni ta se, Mizoram state sorkar nen an thawkho ṭha thei ang em tih zawhna chhangin Lalbiakzama chuan, "Thei tehreng mai. Thawhpui tur dang ka nei dawn chuang lo a, anmahni'n min thawhpui duh a nih phawt chuan ka tih tur chu state sorkar nena ṭha taka sawiho a, Mizoram tan theihtawp chhuah ka tum," a ti.

MP a nih chuan India rama dan tam tak siam, Kristiante nêkchêpna ang chi dante hnûk lêt tur záwng leh siamṭha tur záwnga hmalak chu a hna hmasa tur zinga mi a nih thu a sawi bawk.