Minister a nih dawn avangin BJP Candidate-in tlin a inring

Mizoram Lok Sabha inthlana BJP candidate Vanlalhmuaka chuan, MP a nih chuan sorkar laipuia minister ngei ngei tur a nih avangin Mizoram mipuiin an thlan tlin ngei a inrin thu a sawi.

Vanlalhmuaka hian nimin zinga Ṭhuampui Polling Station-a vote a thlak zawhah thuthar thehdarhtute zawhna chhangin, Pathian leh mipui zarah tlin a inbeisei tih a sawi a, "Tunah hian Mizoram hian central-a sorkar leh ngei ngei tur ruling MP dik tak kan mamawh bakah, central-a minister ngei ngei tur ka nih avangin mipuite'n min vote ngei ka ring," a ti.

MP a nih chuan PM scheme hrang hrangte a taka Mizorama hman a nih theih nan hma a lak dawn thu sawiin Vanlalhmuaka chuan, "Kum 2023-24 a kan manifesto kan en chuan state budget páwn lamah hian cheng vbc. 40,000 chuang hman theih kan nei a, chu chu Pu Modi-a'n min approve sak tawh. Pathian leh mipui zarah kan sorkar chuan Mizorama hnûk lut turin theihtawp ka chhuah ang," a ti a; MP candidate-a nih chhan chu ram intodelh ni tura Mizoram siam a tum vang a nih thu a sawi bawk.