KHAWTHLIR

Thutlukna la siam lo

Assembly speaker Lalbiakzama chuan, Tuichawng bialtu Rasik Mohan Chakma chu MLA aṭanga bàn a nih dawn leh dawn lohah thutlukna a la siam lo. Speaker hian RM Chakma hi MLA leh Chakma Autonomous District Council chief executive member a ni kawp chu dan kalh a nih avangin MLA aṭanga bàn a nih loh chhan sawifiah turin March 23, 2024 khan a hriattir a; RM Chakma hian hun tiam tàwp ní, April 15, 2024 khan insawifiahna a thehlut a ni.

Thil tha tihna ni atan hmang

Serchhipa JM High School Eco Club chuan April 18, Ningani kha thil ṭha tihna ní atan an hmang a, Serchhip Hmar Venga Unity Orphanage Home leh New Serchhipa Zoar Deprived Children Home tlawhin, home-a naupangte thawmhnaw an sûksak bakah, an hmunhma an tihfelsak. Chumi hnuah Serchhip Bazar leh a chhehvela bawlhhlawhte an chhar fai leh a ni.

Dincham lawm

Bualte Branch YMA chuan April 18, Ningani khan an kum 50 (golden jubilee) tlin an lawm a, khuallian YMA Sub. Hqrs. Lunglei, president K Lalfakzuala'n golden jubilee lungphun a hawng. Bualte Branch YMA hi April 18, 1974 khan din ṭan a ni a, tunah hian member 199 an awm mek.

Lokayukta-ah thubuai 54

Mizoram Lokayukta chuan din a nih tirh aṭangin thubuai 54 a ziak lut tawh. Thubuai 54 zinga 23 chu a titawp (closed/disposed off) tawh a, panga chu preliminary enquiry ti loa tihtawp a ni a, pakua chu preliminary enquiry report zir chian hnua tihtawp niin, panga chu hearing neih hnuah tihtawp a ni. Thubuai pali chu regular investigation tih a nih hnuah tihtawp a ni thung. Thubuai pariat chu court-in thutlukna a siam turin court-ah thawn a ni.