Lok Sabha inthlanah vote 56.87% a tla

Parliamentary constituency pakhatna, Mizoram Lok Sabha inthlanpui, April 19, 2024-a neiha vote tla zat a chiang ta a, Mizoram pumah vote 56.87% a tla. Vote tla hi kum 2019 inthlanpuia vote tla 63.13% aiin 6.26%-in a tlem zawk.

Lok Sabha inthlanpuia Mizorama polling station 1,276-a vote tla zat chu Form 17A leh document pawimawh dangte hmangin chhinchhiah fel a ni tawh. Vote tla zawng zawng chu 4,87,103 niin, mipa 2,41,213 leh hmeichhia 2,45,800 an ni a; vote tla percentage chu 56.87% a ni. Vote tla zatah hian postal ballot hmanga vote tla leh EPBS hmanga vote tlate chhiar tel a la ni lo.

District zinga vote tlak ṭhatna ber chu Mamit district niin, voter 65,134 zinga mi 41,329-in vote an thlak a, 63.45% a ni. Aizawl district-ah vote a tla chhe ber a, voter 2,88,304 zinga mi 1,53,638-in vote an tlak a, 53.29% chauh a ni.

Mizorama assembly constituency zinga vote tlak ṭhatna ber chu Lawngtlai district-a Tuichawng bial niin, 72.48% a tla a; vote tlâk chhiatna ber Aizawl East-I bialah 48.22% chauh a tla thung.

Vote tla zat tarlanah hian postal ballot leh electronically transmitted bostal ballot system (ETPBS) kaltlanga vote tlate chhiar tel a la ni lo. Postal ballot hmanga vote thlak zat hi April 19, 2024 thleng khan 2,107 a ni a, chu'ngte chu home voting-a vote tla 1,983 (kum 85 chung lam mi 1,715 leh rualbanlo mi 268) leh essential service vote 124 a ni.

Hetih lai hian, ETPBS kaltlanga vote thlak turin service voter mi 4,693 hnenah vote thlakna thawn chhuah a ni a, vote thlak zat erawh hriat theih a la ni lo.

Hriat theih chinah polling station-a vote thlâk zinga upa ber chu Thanglianhluma, Lawngtlai College Veng niin, kum 104 (25/3/1920-a piang) a ni a; a dawttu chu Hrangkili, Ramhlun North, kum 103 (10/07/1920-a piang) a ni.

Kum 1972-ah Mizoramah Lok Sabha inthlanpui neih ṭan ni mah se, vote thlak a ni lo a, kum 1977 aṭangin Lok Sabha inthlanpuiah vote thlak ṭan a ni. Mizoramah Lok Sabha inthlan ṭum 14 neih ni tawh mah se, vote thlak tak chu ṭum 12 a ni a; kum 1984 khan nomination thehluttu mi pathum zinga pahnih chu hnâwl an nih avangin Congress candidate Lalduhoma chu chuhtu awm loin a tling a, vote thlâk a ngai lo.

Vote thlak ṭum 12 zingah vote a tlak ṭhat ber ṭum - kum 1996 khan 73.41% a tla a, vote a tlâk chhiat ber ṭum - kum 1977 khan 49.92% chauh a tla thung.