Buhfai khul duh lo retailer an awm; 'Dan dika ti tura kan tih vang' - Minister

Tun hnaiah retailer zingah Food, Civil Supplies & Consumer Affairs (FCSCA) kudam aṭanga buhfai khul chhuak duh lo an awm. Buhfai khul duh lo an awm chungchangah FCSCA minister B Lalchhanzova chuan, dan dika thil ti tura an tih vang a nih thu a sawi.

Retailer-te'n kudam aṭanga buhfai an khul loh avangin khua/veng ṭhenkhatah chuan mipuite'n ration buhfai an la thei rih lo. Buhfai khul duh lo zinga a tam zawk chu Aizawl khawpui chhunga retailer-te an ni. Hetih lai hian, retailer eng emaw zat chuan buhfai khulin, mipui hnenah an sem chhuak a ni.

Vanglaini palai zawhna chhangin FCSCA Minister chuan, danin a phût angin retailer-te chu ePOS device (electronic point of sale) hmanga kut zungpui nemte hnenah chauh buhfai pe tawh tura tih an nih thu a sawi a, "January 2024 aṭanga hriattir an ni a, inngaih­hnathiam chhoin, khauh zawkin kan kalpui ta a ni," a ti.

B Lalchhanzova chuan, ePOS device hmang chauha buhfai sem chu retailer ṭhenkhatin an duh lo tih sawiin, "ePOS device hmang chauh hnenah an hralh chuan a bâng tam tak a awm ṭhin a, chu chu man to zawkin an hralh ṭhin," a ti a, retailer an nih dawnin ePOS device hmang chauha buhfai hralh an intiam vek tih a sawi.

FCSCA Minister sawi danin, ePOS device hmang chauha buhfai hralh phal a nih hnuah chuan buhfai hralh bângte chu ration buhfai an sem leh dáwnah an rintir (carry over) ṭhin. Hei hian buhfai leina atana sorkarin sum a sèn ṭhin nasa takin a tlakhniam phah a ni.

Retailer-te ePOS device hmanga an hralh bak carry over tir zel an nih chuan kum khata buhfai lei ṭhin quintal 80,000 velin a tlahniam thei dawn a, sorkarin buhfai leina atana a senso cheng vbc. eng emaw zatin a tlahniam dawn. March 2024-ah ringawt carry over zat chu quintal 6,800 a tling.

Tuna kudam aṭanga buhfai la khul chhuak lo retailer-te pawhin an khul chhuah ngeina turin department chuan hma a la a ni.

Retailer-te chu a bûk dik taka kudam aṭanga buhfai la tura tih an nih dawn thu sawiin B Lalchhanzova chuan, "Buhfai an lak hunah a bûk dikin an la ngei tih retailer-in an ziak ang a, kudama thawktute pawhin a bûk dik ngeiin an la tih an ziak ve bawk ang," a ti. Bûk dik loa kudam aṭanga buhfai la lo tur leh a ṭul chuan department-a thlen mai turin retailer-te a chah a ni.