Rial tlain in eng emaw zat a déng chhia

April 20, Inrinni tlai lama ruahsur leh rial tla vangin Mizoram hmun hrang hrangah chenna in chung a chhia a; Kolasib Vengthara UPC (North East India) inkhawmpui neihna tur pandal sak zawh tawh chu a tlu sawp.

UPC (NEI) inkhawmpui hi April 25-28, 2024 chhunga neih tur a ni a, pandal a chhiat tâk avang leh a hun tur a hnaih tawh avangin nimin chawhma inkhawm bàn aṭangin pandal senghawi hnatlang an nei. Hnatlangte hi Kolasib bawrhsap John LT Sanga'n tlawhin, thingpui inna tur a pe.

Rial tla avangin Kolasib district khaw hrang hrangah rialin a den avangin chenna in 150 chuang a chhia a; hei vang hian Kolasib DC office-a Disaster Cell chu chhiat tâwkte chhawmdawlna tur buaipuiin nimin khan an kal.

East Phaileng, Aizawl district-ah pawh rial tla vangin chenna in 124 chu a chung a chhia a, thawm ṭhat loh chuan luah zui tlak a ni lo.

East Phaileng khawtlang hruaitute chuan nimin khan inkhawm loin in chhia thawm ṭhat hnatlang an ko a, thawm ṭhatna tur chu in neitute'n an tum thung.