Mizoram Lok Sabha inthlan chungah Political party-te'n lawmthu an sawi

Mizorama Lok Sabha inthlanpui April 19, 2024-ah tluang taka neih a nih avangin political party ṭhenkhat chuan thuchhuah siamin an lawm thu an tarlang.

MNF party thuchhuah chuan, buaina leh harsatna awm loa inthlanna muanawm taka zawh a ni chu lawmawm an tih tak zet thu an tarlang a, "Inthlan fel fai leh muanawm a awm theihna tura hun leh thâ séngtu official zawng zawng leh democracy ropuina puang chhuak tura vote hlu tak thlâktu zawng zawng chungah lawmthu kan sawi tak meuh a ni," an ti.

Candidate leh party hrang hrangte inthlan campaign-in Zoram dung tluan fangin an zin chhuak nasa tih sawiin MNF chuan, "Chetsual leh harsatna lian tham thleng loa vote thlâk zawh a ni hi a lawmawm tak zet. Hun ṭha min siamsaktu Pathian chungah lawmthu kan sawi a ni," an ti a; a bik takin MNF candidate vote-tute leh a tlinna tura hun, thâ leh ngaihtuahna séngtu zawng zawng chungah an lawm thu an tarlang bawk.

ZPM party thuchhuah chuan, Lok Sabha inthlan tluang taka zawh a nih tak chungchangah Pathian, mipui, sorkar official leh Election hotute chungah an lawm thu an tarlang.

ZPM hian an party-a department hrang hrang leh party worker hrang hrangte ṭhahnemngai taka an thawhnaah an lawm thu te, Mizorama media hrang hrangte chungahte an lawm thute an tarlang a, "Hun lo kal zel turah pawh thawhhona ṭha tak neih zel kan beisei," an ti.

BJP, Mizoram State chuan, an party candidate vote-tu zawng zawng chungah lawmthu sawiin, "Mizoramin union minister neihna hun ṭha tak kan nei a, Mizoram mipui hian party politics kan âtchilh bur lo a nih chuan BJP MP kan neih ngei kan ring," an ti.

India ram pum thlirin, Lok Sabha MP awm zat 543 aṭangin BJP leh a thawhpuite'n MP 400 chuang an neih beisei a nih thu sawiin BJP chuan, "Mizoram MP pawh opposition lamah nge ruling lamah a ṭhut dawn tih chu kan thlir mek. Central blessing kan duh ang chiah hian a luankawr erawh kan hnâwl ṭhin avang leh NDA tak tak kan neih loh avangin kan state-ah kan beisei development a thleng ṭhin lo," an ti a; sorkar din chhan 'hmasawnna' a thlen theih nan BJP/NDA tak tak sorkar Mizoramah a awm ve a ngai niin an sawi.