Kum hnih chhunga ADMACS sum che vêl Rs 8,14,43,456.75 a tling

Aizawl District Marketing Cooperative Society Limited (ADMACS) chuan April 20, Inrinni khan Aizawl Press Club-ah Annual General Assembly an nei a; kum hnih chhunga an sum che vêl (financial transaction) chu Rs 8,14,43,456.75 a nih thu an tarlang. ADMACS hi kum 1982-ah din a ni.

ADMACS inkhawmpui kaihruaitu, an chairman LT Sanga chuan, ADMACS-a share holder-te leh member-te chu an society ṭhan chhoh chhan a nih thu a sawi a, "Office lama thawktu, a bikin kan hruaitu hmasa te, kan Secretary & General Manager thawhrimna liau liau a ni," a ti a; an tu leh fate tan leh dinhmun chhe zawkte dinchhuahna tura khaichhuaktu an nih zel theih nan ṭang mar zel turin member-te a chah.

LT Sanga chuan, "Sorkar ṭanpuina kan duh lo tihna ni loin, tun hnua kan society-a mawhphurhna kan chelh ve hnu hian sorkar aṭanga cheng khat pawh dawng loin tun dinhmun hi kan thleng thei. Eng party pawh sorkar se, kan thawhpui zel ang a, sorkara innghat erawh kan ni tur a ni lo," a ti a; Member Development Scheme atana Rs 20,00,000 an dah chu an member-te dinchhuahna atan ruahmanna siamin ṭangkai taka hman an tum thu a sawi.

ADMACS secretary leh general manager Lianthangpuia tarlan danin, kum hnih - 2022-23 leh 2023-24 chhunga ADMACS sum che vel chu Rs 8,14,43,456.75 a ni a, closing balance Rs 2,03,51,869.71 an nei.

Kum 2023-24 chhungin mi 100 chuang hnenah loan Rs 1,60,71,500 an pe chhuak a, loan an pek chhuah an hmuh lêt chu Rs 97,06,875.75 a ni. An hnena pawisa dah, lak chhuah hun a thlena la chhuak lehte hnenah Rs 3,97,77,008 an pe chhuak bawk.

Kumin 2023-24 chhung vekin scheme hrang hrang - saving, pigmy, fixed leh recurring deposit aṭangin Rs 6,51,90,659 an hmu a, sorkarin share Rs 4,60,500 a nei a, member-te share thawh tling khawm chu Rs 3,66,500 a ni.