Mizoram Lok Sabha inthlanpuiah vote tla 50% tlin lohna bial 3 a awm

April 19, 2024-a Mizorama Lok Sabha inthlanpui vote thlâkah Mizorama Assembly bial 40 zinga bial pathumah vote tla 50% a tling lo a, chutih laiin, vote tlak ṭhatna ber Tuichawng bialah 72.48% a tla thung.

Mizoram Election department chhinchhiah danin, kumina Lok Sabha inthlan vote thlak zawh tâkah hian vote tlak ṭhatna ber Tuichawng AC-ah voter 36,511 zinga mi 26,463-in vote an thlak a, chu chu 72.48% a tling. West Tuipui bialah voter 17,024 zinga 11,939-in vote an thlâk a, 70.13% a ni. Tuichawng leh West Tuipui hi vote tla 70% a tlinna bial awm chhunte an ni. Vote tlak ṭhat lama pathumna Dampa bialah voter 19,996 zinga 12,914-in vote thlakin, 64.58% a ni.

Hetih lai hian, Assembly bial 40 zinga pathum - Aizawl East-I, Aizawl North-I leh Lawngtlai East bialahte vote tla 50% a tling lo.

Vote tlak chhiatna ber Aizawl East-I bialah voter 28,972 zinga 13,971-in vote an thlak a, vote tla percentage chu 48.22% chauh a ni. Lawngtlai East bialah voter 26,154 zinga 12,907-in vote thlakin, 49.35% a ni a; Aizawl North-I bialah voter 26,998 zinga 13,470-in vote thlakin, 49.89% a ni bawk.