Tlawnga tuitla awm palh atan inbuatsaih

YMA, Maubawk Branch chuan April 20, Inrinni khan Tlawng luiah tui tla an awm palh chánga awmze nei zawk leh ṭha zawnga tuitla zawn a nih theih nan inbuatsaihna hun an hmang a; tui hleuh, tuia inpil rei siak leh tui chhunga thil zawn intihsiak an buatsaih.

Intihsiakna ṭan hmain Maubawk Branch YMA president Vanlalchhuanga chuan, intihsiak buatsaih chhan chu Tlawng luiah kum tin tuitla zawn ngai an awm ṭhin vang a nih thu a sawi a, "Tuitla hmuh mai a nih loh hian a hnaivai leh neitu chan changa inngai ber vengte kan chêt chhuah a ngai ṭhin. Ṭhalaite kan inruahman a, huaisen taka kan mihringpuite kan chhanchhuah hi kan tihmâkmawh a ni a, vanduaina thleng palh atan kan inruahman lâwk a ngai a ni," a ti.

Maubawk YMA President chuan, an venga tuithiamte an upa ve zel tih sawiin, "Ṭhangtharte'n an aite kan awh chhoh ve zel a ngai a, chutiang tur chuan ṭhalai zawkte kan inbuatsaih ve zel a ngai a ni," a ti bawk.

Maubawk YMA chuan, Tlawng luia Reiek kai leh a chhehvel a chhengchhia a, mi tam takin hun hlimawm hmanna atan hmangin an kal ṭhin tih an tarlang a; luiah thûk thut thut a awm avangin fimkhur a ngai a, lui nuam tak ni mah se, vanduaina thlen theihna a nih avangin Tlawng lui tlawhtute chu fimkhur turin an ngen a, ruihhlo nen phei chuan intihhlimna hun hmang lo turin an chah a ni.

Inrinnia Maubawk YMA hmalakna hi branch YMA hnuaia Disaster Sub-Committee kaihhruainaa buatsaih a ni a, YMA member 100 chuang an chhuak a ni.