KHAWTHLIR

Thisen pe

April 20, Inrinni khan KṬP, Bungkawn Pastor Bial chuan Synod Hospital tan thisen unit 76 an pe a, petute mipa 50 leh hmeichhia 26 an ni a; KṬP, Bethlehem Branch pawhin Civil Hospital, Aizawl tan unit 52 an pe a, petute mipa 42 leh hmeichhia 10 an ni. Inrinni vek khan Salvation Army Youth, Central Division chuan ZMC tan Darlawngah thisen unit 72 an pe a, petute mipa 61 leh hmeichhia 11 an ni.

Heroin man

Assam Rifles-te chuan April 20, Inrinni khan Champhai district-a Mélbûk huam chhungah mi pakhat hnen aṭangin heroin (no. 4) gram 61 an man a, Zokhawthar police hnenah an hlân. Heroin an man hi Rs 42,70,000 hu a ni.

Tla hlum

Robert K Lalchhuan-awma (52) h/o Lalngaihsaki, Republic Vengthlang chu April 20, Inrinni chawhma lam khan an in chung aṭangin a tla a, damdawi-inah hun eng emaw chen enkawl a nih hnuah a hliam tuar loin nimin chawhma dar 9 khan a thi.

Post poll scrutiny

Lok Sabha inthlan neih zawh taka vote thlak kaihhnawihah April 20, Inrinni khan district hrang hrangah Form 17A (Register of Votes), Presiding Officers diary-te leh lehkha pawimawh dangte Election Commission of India-in tehfung hrang hrang a siam hmanga enfiahna, post poll scrutiny neih a ni a, election official-te leh political party aiawhte an tel. Post poll scrutiny-ah hian thil dik lo leh felhlel hmuh a nih loh thu sorkar thuchhuahin a tarlang.