Lailapur-ah lirthei an la dang zel Ramri-ah boruak ṭha lo a awm rih lo

Vanglaini palai zawhna chhángin Kolasib DC Dr H Lalthlangliana chuan, Union Home Secretary hoa state pahnih Chief Secretary-te inbiakna angin Cachar DC-in nimin khan inbiakpuiah a rawn sàwm thu a sawi a, "An duh duh dana awm tur kan nih loh avangin naktuk (Inrinni)-a inbe turin ruahmanna ka siampui," a ti.

Kolasib DC chuan, Cachar DC nen an inbia a nih pawhin sawi tur vak a neih loh thu sawiin, "Union Home Secretary hoa CS pahnihte'n an rel angin keini chuan lirthei Mizorama dante kan chhuah tawh a, Lailapur-a an dan khawm chhuahtir chu an mawhphurhna a nih thu ka hrilh ang," a ti a; police duty chungchang an sawi chuan Mizoram chinah bak kan duty tir loh thu a sawi nawn leh tur thu a sawi.

Vairengte aṭanga Vanglaini thu dawn danin, October 29, Ningani zan dar 10:30 vel aṭangin Assam lam pan tur lirthei dan khawmte chu kaltir an ni a, lirthei 300 chuangin Vairengte pêlin Assam an lut. Lailapur, Assam aṭanga bungrua Mizorama phur lût turte erawh chu an la dang reng thung.

Mizo IR police-te chu Vaireng­te khawtlangin auto-rickshaw stand thlanga an awmna hmun tur an saksakah an la awm reng a, Assam police hmuh tur an awm lo.

Saihapui-V aṭanga thu dawn danin, Assam lam aṭangin niminah Mizoram lama rawn kal an awm lo a, an thu leh hla hriat thar tur a awm lo. Mizo IR-te chu mipuiin lei bula an awmna tur hmun an siamsakah an la duty zui zel a ni.

Vanglaini-in Zawlnuam aṭanga thu a dawn danin, Assam lam aṭangin bungraw phur lirthei lut a awm lo a, Assam lamin an la dang nge, kal lo turin an infuih tih hriat theih a ni lo. Bungraw rawn luh loh avangin khawtlangin harsatna an tâwk lêm lo.

Bairabi aṭanga Vanglaini thu dawn danin, Mizoram aṭanga Assam lam pan turte chu Ningani zan aṭang khan chhuahtir an ni a, Assam aṭanga bungraw lut turte erawh chu Hailakandi mite'n an la dang chhunzawm zel thung.