Covid-19: Mizoram dinhmun Hripui vei 38 hmuh belh a ni
October 29, Ningani khan Mizoramah Covid-19 vei mi 38 hmuh chhuah a ni a, nimin khan hripui laka fihlim tawh mi 15 chhuahtir an ni thung. Hripui vei hmuh chhuah tawh zawng zawng chu mi 2,694 an ni a, an zinga mi 2,273 (84.37%) chu chhuahtir an ni tawh.
Covid-19 positive Ningania hmuh chhuahte chu mipa 23 leh hmeichhia 15 an ni a; ZMC laboratory-a hmuh chhuah mi 19, TrueNAT-PCR hmanga Lungleia hmuh mi pakhat leh, Rapid Antigen Test (RAT) hmanga Aizawla hmuh mi 15, Lunglei, Kolasib leh Mamit district-a hmuh pakhat ṭheuh an ni.
SRH-ZMC Bulletin tarlan danin, hripui vei zinga fihlîm tawh nimin khan mi 15 chhuahtir an ni a; SRH-ZMC aṭangin mi pathum (mipa 2, hmeichhia 1), Lunglei Sazaikawn CCC aṭangin pali, Chhiahtlang CCC aṭangin paruk, Champhai leh Lawngtlai CCC aṭangin mi pakhat ve ve an chhuak.
Mizoramah Covid-19 positive mi 2,694 hmuh chhuah tawh a ni a, mipa 2,095 leh hmeichhia 599 an ni. An zinga mi 2,273 (84.37%) chu chhuahtir an ni tawh a, mi pakhat (0.03%) thi tawhin, enkawl mek mi 420 (15.60%) an awm.
October 29 khan district hrang hrangah mi 1,582-te swab sample endik a ni a; ZMC laboratory-ah RT-PCR hmangin sample 732, district pakuaah TrueNAT-PCR hmangin sample 156 leh RAT hmangin district pakuaah sample 694 endik a ni.
ZMC-a hmuh chhuahte:
Covid-19 vei ZMC-a hmuh chhuah mi 19-te chu Aizawl khawpuia mi vek niin, mipa pariat leh hmeichhia 11 an ni a; tualchhunga kái chhâwng mi 17 leh state páwn aṭanga rawn lut thar mi pahnih an ni.
State páwn aṭanga rawn lutte chu - mipa kum 25 ve ve, Assam Rifles sipai, Zokhawsanga AR hmuna quarantine facility-a khung hran lai an ni a, symptom an nei lo.
Sorkar thuchhuah tarlan danin, Aizawl tualchhunga kái chhâwngte chu - Ramhlun South-a mi pariat, Ramhlun North, Ramhlun Sports Complex leh Chanmari venga mi pahnih ṭheuh, Kanan Veng, Luangmual leh Republic Vengthlanga mi pakhat ṭheuh an ni a; an dinhmun kimchang chu hmun dangah tarlan a ni.
TrueNAT hmanga hmuh:
Lunglei Civil Hospital laboratory-ah TrueNAT-PCR hmangin hripui vei mi pakhat hmuh chhuah a ni a; 131 Bn BSF sipai kum 29 mi niin, Mizoram chhunga kái, symptom nei lo a ni tih, sorkar thuchhuahin a tarlang.
RAT hmanga hmuh:
RAT hmangin Covid-19 vei mi 18, mipa paruk leh hmeichhia 12 hmuh chhuah a ni a, Mizoram chhunga kai chhawng vek an ni. A naupang ber kum 8 mi a nih laiin, upa ber chu kum 79 mi a ni a; Aizawl khawpui mi 12, Lunglei mi pakhat leh thingtlang khaw dang pathum - Dâpchhuah, Seling leh Vairengtea mite an ni.
RAT hmanga hmuh chhuahte hi Mizoram chhunga kái chhâwng vek an nih avangin an dinhmun chu chiang zawkin hmun dangah tarlan a ni.