KHAWTHLIR

Inrinni khan Ramhlun Branch KṬP chuan an kohhran hall-ah Synod Hospital tan thisen unit 53 an pe a, petute mipa 45 leh hmeichhia pariat an ni a; Melthum Branch KṬP pawhin Synod Hospital blood bank-ah kalin thisen unit 13 an pe a, petute mipa 11 leh hmeichhia pahnih an ni. Lungleng-I Bial KṬP chuan Aizawl Civil Hospital tan thisen unit 47 an pe a, petute mipa 40 leh hmeichhia pasarih an ni. Inrinni vek khan Hrangchalkawn Bial ṬKP-te'n Lunglei Civil Hospital tan thisen unit 41 an pe a, petute mipa 33 leh hmeichhia pariat an ni.

Zoram Peoples' Movement (ZPM) chuan vawiin chawhma dar 11:00 hian kumin atan an pisa an hawng dawn. Pisa hawn inkhawmah hian ZPM president Lalliansawta leh Vanlalhlana, MLA-te'n thu an sawi ang.

Childline Mamit leh Children Sanitation Club, Mamit Chhimveng ṭangkawp chuan Inrinni zing khan Mamit khawpuia vantlang hmunte thianfaiin an hnatlang a, mi 160 vel an thawk chhuak.

Lunglei DC chuan hriattirna ti chhuakin Phai­ruangkai lei, Lunglei to Tlabung road ami chu a zapui thir khi siamṭhat a ni tawh thu tarlang­in, "Tunah hian leiin a dawl zawh chin chu ton 12 a ni a, leiin a dawl zawh tawk aia rit phur lirthei tlan phal a ni lo tih mipuite kan inhriattir a ni. PWD(Highway) chuan a nihna tur ang tak ton 35 a rit dawl zo tura major repair hna thawk turin hma an la mek a ni," a ti. 

Lengteng bialtu MLA L Thangmawia chuan tun hnai khan a bial chhung khaw hrang hrang - Kawlkulh, Dulte, Puilo, Chhawrtui leh Vanchengpui khua hmasawnna hnathawh mekte a enfiah. 

Mizoram Police-te chuan vawiin chawhma dar 10 leh tlai dar 4 inkar hian an dincham pual­in Vanapa Hall-ah an ralthuam neih ṭhatte a duh apiang en theih turin an pho chhuak dawn a, ralthuam chungchanga zawhna neite lo chhang a, lo hrilhfiah turin expert-te'n an vil reng dawn.