Selesiha in kângah naute a kâng hlum

October 29, Ningani zan dar 6:30 vel khan College of Veterinary Sciences & Animal Hus­bandry, Selesiha quarters pakhatah kângmei a chhuak a, Affrin (3), Assam lam mi chu damdawi-in panpui a nih hnuah a hliam tuar loin a thi a, mi dang pathum an hliam bawk.

YMA, Selesih Branch hruaitute hnen aṭanga thu dawn danin, kângmei chhuahna hi RCC building chhâwng nga a ni a, chhungkaw parukin an luah mek. In chhâwng hnuai berah kângmei a chhuak a, tlan chhuahna tur lam a kan nasat avang leh mei khû a nasat avangin a chung lama mite chu an insaseng mai thei lo a, ṭhenkhat chu pipe aṭangin an uaithla a ni.

Kângmei chhuak­a hliamte chu Malsawm­kima, Selesih leh Affrin-i pa leh hnam dang pakhat an ni a, Synod Hospital-ah enkawl mek an ni. Malsawmkima hian tlân chhuah a tum laiin naute ṭap thâwm a hriat avangin a lêt leh a, mahse, mei alh a nasat tawh avangin naute chu chhan thei loin a hliam a ni.

Affrin-i hi Selesih Branch YMA-te'n thlahna hun an hman hnuah nimin zing khan an khua (Silchar bul) panpui a ni a, a nu leh nausén thla khat mi bakah, Selesih aṭangin mi tlawmngaite'n an zui a, a pa erawh chu a hliam avangin a kal ve thei lo. In a kan lai hian Affrin-i nu leh nautê chu an ṭhenawma an lèn lai a ni.