Mizoram sorkar hnuaiah post ruak 35.20% a awm

Mizoram sorkar hnuaiah group A, B, C leh D-ah sanctioned post 71,682 a awm a, February 27, 2024 dinhmun angin post zinga 64.80% hnawh khah niin, post ruak 35.20% a awm.

Mizoram sorkarin February 27, 2024-a 'Statement on Salary & Employment Data in Government, PSUs and aided Institutions (2024-2025)' a tihchhuaha a lan danin, Mizoram sorkar hnuaiah group A, B, C leh D-ah post 71,682 a awm a, chu'ng zinga 46,452 (64.80%) chu hnawh khah niin, post ruak 25,230 (35.20%) a awm. Post 33,412 chu permanent post a ni a, post 38,270 chu temporary post a ni.

Mizoram sorkar (government, PSU leh aided institution) hnuaiah hian group A bikah sanctioned post 7,232 awmin, post 5,631 (77.86%) hnawhkhah a ni. Group B-ah sanction post 30,468 zinga 20,369 (66.85%), group C-ah sanction post 21,856 zinga 12,800 (58.57%) leh group D-ah sanction post 12,126 zinga 7,652 (63.10%) hnawhkhah a ni bawk.

Sorkar hnathawk hrang hrang zingah group C hnuaiah post ruak a tam ber a, sanctioned post zawng zawng aṭangin post ruak 41.43% a awm. Group A hnuaiah post ruak 22.14% awmin, post ruak a tlem ber thung.

Sorkar hna permanent post 33,412 zinga 21,555 (64.51%) hnawhkhah a ni a; permanent post zingah hian group A post hnawhkhah tam berin, post 2,818 zinga 2,133 (75.69%) hnawh khah a ni. Temporary post 38,270 zinga 24,897 (65.06%) hnawhkhah a ni a, post hnahkhah tam ber chu group A niin, post 4,414 zinga 3,498 (79.25%) hnawhkhah a ni.

Permanent post zingah group B post 14,398 zinga 8,904 (61.84%) hnawhkhah niin a tlem ber a; temporary post zingah group C post 12,454 zinga 6,752 (54.22%) hnawhkhah niin a tlem ber.